די תלמידים פון די נייע ישיבה גדולה תורת משולם פייש ד'טאהש אין ניו יארק, גרייטן זיך בהכנה דרבה צו א געהויבענע און ערשטמאליגע שבת בצל הקודש, ווען כ"ק אדמו"ר מטאהש שליט"א וועט צום ערשטן מאל פראווענען א שבת בין כותלי הישיבה, און פארברענגען אינאיינעם מיט תלמידיו הקרוים בנים.
די שבת איז באשטימט אויף דעם קומענדיגן שבת קודש פרשת בהעלותך, שבת בעפאר די הילולא קדישא פון הרה"ק רבי אלימלך השרף מטאהש זי"ע, ווען דער רבי שליט"א וועט פראווענען אלע תפילות און טישן אויף א ספעציעלן פארנעם אויסשליסליך מיט די חשובע בחורים תלמידי הישיבה, אינעם בנין הישיבה אין טשעסטער ניו יארק.
מטעם הנהלת הישיבה איז ארויסגעשטעלט געווארן א מודעה און בקשה פאר אלע חסידים, אז וויבאלד דער רבי שליט"א קומט ספעציעל צו די בחורים צו משפיע זיין אויף זיי אויף א פריוואטע פארנעם און פארברענגען אינאיינעם מיט די בחורים, זאלן די חסידים פון נאנט און ווייט בכלל נישט קומען מיטהאלטן דעם שבת בצל הקודש.
