נאך לאנגע יארן וואס עס איז אנגעגאנגען א בוי פראיעקט ביים סקווירא בית המדרש אויף ראמען באללערוואד אין מאנסי, אויפצובויען א נייע בנין פארן בית המדרש לרווחת הציבור, איז עס אין א מזל'דיגע שעה באנייעט געווארן פארלאפענעם פרשת נצבים, שטייענדיג אין סאמע ברען פון די ימי הרחמים והסליחות.
פרייטאג נאכמיטאג איז פארגעקומען א גרויסע מעמד פתיחת שערים, אין שפיץ פון הגה"צ ר' אהרן מענדיל טווערסקי שליט"א בנו הגדול פון כ"ק אדמו"ר מסקווירא שליט"א, וועלכער האט קובע געווען די מזוזות אויפן נייעם בנין, און פארגעזאגט פרקי תהלים כנהוג. אזוי אויך האט ער אויפגעטרעטן מיט א שמועס און איבערגעגעבן ברכת הקודש פון אביו הגדול דער סקווירא רבי. דערנאך איז פארגעקומען א סדר לימוד תורה ברבים צו מחנך זיין דעם נייעם היכל ביהמ"ד מיט לימוד התורה, און דערנאך האט דער דיין הביהמ"ד הרה"ג ר' יעקב יוסף גאלדמאן שליט"א אויפגעטרעטן מיטן דרשת חינוך בית המדרש. אזוי אויך איז פארגעקומען א ספעציעלע מעמד סיום ששה סדרי משנה לע"נ די חשובע מתפללים וואס זענען נפטר געווארן אין די לעצטערע יארן, אריינגערעכנט דער רב הביהמ"ד הגה"צ רבי משה גרין זצ"ל ראש ישיבה דמאנסי.
