אין א היסטארישע שריט האט כ"ק אדמו"ר מבאבוב 45 שליט"א צונויפגעזאמלט כל קהל חסידיו אנשים ונשים, צו אן עלפאלגרייכע אסיפה נחוצה מחזק צו זיין די גדרי הצניעות צווישן די חסידים, און אין א ערשטמאליגע שריט האט דער רבי שליט"א אוועקגעשטעלט שטאנדהאפטיגע תקנות צו מוסיף זיין קדושה וטהרה אין דעם מחנה אלקים, ממשיך צו זיין השראת השכינה אין די שטיבער פון אנשי שלומו היקרים הצמודים על לוח לבו.
די אסיפה איז פארגעקומען פארגאנגענעם מיטוואך אויפדערנאכט פרשת תרומה ליל ערב ראש חודש אדר, אין די ריזן די פאלאס זאל וואס איז געווען איבערגעפולט מקצה אל קצה, און טראץ וואס עס איז געווען צוגעגרייט טויזענטער זיץ פלעצער סיי ביי די עזרת אנשים און סיי ביי די עזרת נשים, איז נאך אלס געווען פיל א גרעסערער ציבור וואס האט געדארפט בלייבן שטיין ארינגס און ארום צו קענען מיטהאלטן דעם גרויסן אסיפה.
מיט דברי פתיחה האט אויפגעטרעטן הגה"צ ר' חיים פייוויל שנעעבאלג שליט"א רב דקהל אברכים אין מאנסי, וועלכער האט עלעקטעריזירט דעם ציבור בנועם לשונו און מעורר געווען אלע אנוועזנדע איבער די חומר הענין, די קלארע איסורים פון אן הלכה'דיגע שטאנדפונקט איבער די היינטיגע שייטלען און מאדעס למיניהם, און דערנאך האט ער פארגעזעצט מיט דברי התעוררות און חיזוק, און קלארגעשטעלט אז אויב אזא קהילה קדושה איז מצליח איינצופעדימען שטארקע תקנות בעניני צניעות, וועט דאס האבן א פולקאמע השפעה אויף טויזענטער אידן איבער די וועלט.
דאן האט כ"ק אדמו"ר מבאבוב 45 שליט"א אויפגעטרעטן מיט דברות קודש, און אין א אויסנאמליכע שריט אדרעסירט די הצלחה און סייעתא דשמיא וואס מען זעהט בין כותלי הקהילה והמוסדות אויף טריט און שריט, די פאקט אז פון איבעראל זוכט מען צו קומען לערנען אין די מוסדות, און מען דארף זעהן אנצוהאלטן דעם הויכן ניווא מיטן זיך מקבל זיין פרישע קבלות בעניני צניעות, צו שטייגן א העכערע דרגא און אויספאלגן די גענויע תקנות.
דער רבי האט ערווענט די מורא'דיגע הצלחה וואס מען זעהט בין כותלי המוסדות פאר די בנות ישראל הכשרות, און דערמאנט לשבח די חשובע מנהלות, און הרבנית אשת חבר הגה"צ אבד"ק באבוב 45 שליט"א וואס שטייט אין שפיץ פון דעם ריזן חינוך אימפעריע, און לייגט אריין די געוואונטשענע השפעה מדרך אבותינו ורבותינו הקדושים.
דער רבי האט דאן צוגעטרעטן איבער די חשיבות פון נשים צדקניות וואס טוען אויפשטעלן די קומענדיגע דורות מיט געטריישאפט, און געבן זיך אפ בגוף ובנפש צו מחנך זיין די צאן קדשים ווי די אלטע מסורה. דאן האט דער רבי דערמאנט די קלארע הלכות און פסקים איבער שייטלעך, וואס איז באקאנט מפי צדיקים הקודמים, דער הייליגער צאנזער רב זי"ע בעל דברי חיים וועלכער האט געשטעלט אן איסור דערויף, און דער הייליגער קדושת ציון דער באבובער רב זי"ע וועלכער האט שטארק מעורר געווען יעדן דערוועגן, טראץ וואס אין גאליציע איז רוב ציבור געגאנגען מיט שייטלעך.
דערנאך האט דער רבי דערמאנט די קול קורא וואס איז ערשינען מיט פערציג יאר צוריק איבער די איסור פון גיין לאנגע שייטלען, און איז אונטערגעשריבן געווארן דורכ'ן זיידן הרה"ק מבאבוב זי"ע, דער רבי האט פארגעזעצט איבער די חומר הענין פון גיין לאנגע שייטלעך, און א לענגערע צייט מרחיב געווען איבער דעם ענין, סיי די איסור פון לאנגע שייטלעך, און סיי די חומרות און הידורים ארום דעם.
דער רבי האט קלארגעשטעלט אז מען שטעלט אוועק יעצט תקנות קבועות אין די קהילה, און דורכאויס די קומענדיגע וואכן ביז יום טוב פסח דארף יעדער איינער דאס נאכקומען. אויסער דעם האט דער רבי דערמאנט אז עס איז דא נאך וויכטיגע נקודות צו רעדן, און עס איז ראטזאם צו איבערקוקן די שמועס וואס ער האט איבערגעגעבן מיט ניין יאר צוריק בעניני צניעות, בעצם יום הקדוש.
צום שלוס האט הרה"ג ר' אהרן יודא גארדאן שליט"א ר"ם במתיבתא אויפגעטרעטן מיט די קלארע תקנות קבועות וואס ווערט אוועקגעשטעלט, דורך א ספעציעלע וועד פון נשים צדקניות אין שפיץ פון אשת חבר הגה"צ ר' חיים בנציון אונגער שליט"א זון פונעם רבי'ן, מען האט פארטיילט די צעטלעך וואו עס שטייט די הוראות על פי הלכה, און די חומרות און הידורים וואס איז ראטזאם זיך צו מקבל זיין. אלע חברי הקהילה הם ונשיהם דארפן דאס אונטערשרייבן, און דורכאויס די קומענדיגע טעג וועט מען דאס קענען איבערגעבן פערזענליך פארן רבי'ן ביי ספעציעלע זמני קבלת קהל בקודש פנימה.
אזוי אויך איז געמאלדן געווארן אז די קהילה שטעלט צו שייטל מאכערס וואס וועלן אלעס צושטעלן צו נאכקומען די תקנות קבועות, און פונעם רבינ'ס שטוב וועט מען באצאלן די קאסטן וואס עס פעלט אויס אצינד צו קענען נאכקומען די פארלאנגטע תקנות, ווען פאר די נשים צדקניות וואס וועלן אינגאנצן אויסטון דעם שייטל וועט מען געבן א גרויסע סכום געלט אלס מתנה.
