שטייענדיג געציילטע טעג בעפאר די געהויבענע באזוך פון הגה"צ ר' אהרן מרדכי רוקח שליט"א בנו יחידו פון כ"ק אדמו"ר מבעלזא שליט"א, צו באשיינען אין שפיץ פון די מלכות'דיגע אויפנאמע "הרחבת המלוכה" בקרב חסידי בעלזא אין בארא פארק, זעט זיך שוין אן אין פולן שוואונג די מגבית אדירה אויפצוטרייבן די פאנטאסטישע סומע פון צען מיליאן דאללער, אהערצושטעלן מיט פראכט די נייע יונגל קעמפ וואס ווערט געבויעט לשם ולתפארת אין די קאנטרי בערג, צוצוברענגען א פאסיגע אכסניא פאר די תינוקות של בית רבן מחנה בני בעלזא.
דער חשובער גאסט איז ערווארטעט אנצוקומען דעם סוף וואך קיין אמעריקע, און פראווענען א היסטארישע שבת בקרב חסידי בעלזא אין בארא פארק, צום ערשטן מאל אין פערצן יאר וואס דער חשובער גאסט וועט פראווענען א שבת אין בארא פארק. די גאנצע שבת וועט געפראוועט ווערן אין די גיגאנאטישע תלמוד תורה בנין דחסידי בעלזא אין בארא פארק במקהלות אלפי חסידים פון נאנט און ווייט.
אלע בעלזא חסידים אין בארא פארק זענען איינגעשפאנט מיט התלהבות צו פאראויסרוקן דעם מאסיוון פראיעקט אויפצובויען די נייע יונגל קעמפ, און דורכאויס די געהויבענע באזוך פונעם חשובן גאסט וועט פארקומען א רייע מסיבות, און צום קלימאקס די צענטראלע מעמד געאייגנט פאר די נדיבי לב, וואס וועט פארקומען זונטאג אין די פראכטפולע עבאוו זאל אין סטעטן איילענד.
אריבער פופציג תומכים נגידי בית בעלזא האבן שוין באשטימט זייער זיץ ביים היסטארישע מעמד, צו זיין א טייל פון די כנסיה לשם שמים און צולייגן א פלייצע צום הרחבת המלוכה. דאס קומט מיט א מורא'דיגע געטריישאפט פון חסידי בית בעלזא, וואס האבן שוין אין די לעצטע פאר יאר אריינגעגאסן שווערע געלטער אויפצובויען די גיגאנטישע בנין התלמוד תורה אין בארא פארק, און די רענאוואציעס וואס איז דורכגעפירט געווארן אויף די מיידל שולע בנין בית מלכה דחסידי בעלזא אין בארא פארק.
