אלפי חסידי צאנז זענען ערווארטעט ארויסצוקומען אויף א גרויסארטיגע עצרת מחאה אדירה מארגן דאנערשטאג, נאך וואס אין די לעצטערע טעג זענען צוויי צאנזער חסידים, א בחור און א אינגערמאן, ארעסטירט געווארן פארן איינציגן זינד פון זיך נישט שטעלן צום ציוניסטישן מיליטער.
בהוראת הקודש פון כ"ק אדמו"ר מצאנז שליט"א האבן די רבני ועסקני הקהילה זיך צוזאמגעזעצט אויף א דריגענדע אסיפה, וואו מען האט דורכגעטון בכובד ראש פארשידענע תכסיסי מלחמה וויאזוי צו לוחם זיין כדת של תורה, זיך אננעמען פאר כבוד שמים און מחזק זיין די אסירי ציון.
אצינד איז באשטעטיגט געווארן די פלענער פאר א גרויסע מעמד עצרת מחאה וואס וועט פארקומען דעם דאנערשטאג נאכמיטאג, ווען טויזענטער חסידים פון איבער גאנץ ארץ ישראל וועלן זיך פארזאמלען פארנט פון די מיליטערישע טורמע אויסצושרייען דעם קול מחאה, און שיקן עמערס חיזוק פאר די אסירי ציון וואס שמאכטן דארט אין טורמע.
