א שרעקליכע טרויער הערשט ברחובות העיר ירושלים ומחוזותיה, נאך די פריהצייטיגע פטירה פון הרב החסיד ר' שמעון ברוין ז"ל, מגדולי עסקני יהדות החרדית בארץ הקודש, באקאנטער עסקן בעניני רפואה, און משמש בקודש ביי כ"ק אדמו"ר מתולדות אהרן זצ"ל בעל דברי אמונה.
הרב החסיד ר' שמעון איז אויפגעוואקסן אין די ריינע ירושלימער געסעלעך, געלערנט אין תלמוד תורה תולדות אהרן, און פון יונגווייז אן זיך מקשר געווען צו זיין גרויסן רבי'ן הרה"ק בעל דברי אמונה זצ"ל. אלס אינגערמאן איז ער געווארן אויפגענומען צו דינען אלס משמש בקודש ביים רבי'ן זצ"ל, א תפקיד וואס ער האט אנגעהאלטן א שיינע תקופה מיט א זעלטענע געטריישאפט, איבערהויפט אויף די עלטערע יארן ווען דער רבי זצ"ל איז געווען אנגעוויזן אויף שטענדיגע הילף, און ר' שמעון האט זיך ממש מוסר נפש געווען יומם ולילה פארן רבינ'ס געזונט.
ר' שמעון איז געווען א באקאנטער עסקן פאר מעדיצינישע אנגעלעגנהייטן, מיט זיינע ווייטגרייכנדע קשרים האט ער געבראכן טירן און מויערן, און באוויזן ארויסצוהעלפן חולי ישראל ומשמשיהן אויף א גאר שטארקע פארנעם. ער האט מייסד געווען דעם ארגענעזאציע "ביקור חולים יד אברהם" וואס שטעלט צו הילף פאר אחינו בני ישראל אין צייט פון נויט, אלס איז ער געווען א אפענע אדרעס פאר סיי וועם, איבערהויפט פאר צענדליגע אדמורי"ם ורבנים וואס האבן זיך כסדר געוואנדן צו זיין טיר פאר הילף.
ליידער האט ער זיך געמוטשעט מיט די ביטערע מחלה ה"י די לעצטע תקופה, און היינט צופרי איז ער נפטר געווארן אין בליענדן עלטער פון פינף און זעכציג יאר. ביי די לוויה וואס איז פארגעקומען היינט נאכמיטאג פארנט פון ביהמ"ד הגדול תולדות אהרן אין ירושלים, האבן מספיד געווען דורכן טעלעפאן כ"ק אדמו"ר מתולדות אהרן שליט"א וואס געפונט זיך אצינד אין ניו יארק, הגאון הגדול פוסק הדור מרא דארעא קדישא שליט"א וועלכער האט ארויסגעברענגט שיינע שטריכן פונעם גרויסן נפטר. אויך האבן מספיד געווען עטליכע בני המשפחה, הגה"צ ר' משה קאהן שליט"א ראש ישיבת תולדות אהרן, כ"ק אדמו"ר מנחלת אהרן שליט"א, הגה"צ ר' יעקב מענדיל יאראוויטש שליט"א חבר ביד"ץ העדה החרדית, און הגאון ר' אליעזר כהנמן שליט"א נשיא ישיבת פאנאוויטש. אויך האבן זיך משתתף געווען ביי די לוויה כ"ק מרנן האדמורי"ם מתולדות אברהם יצחק, באיאן, פינסק קארלין, און דעעש.
