א גאר רירנדע אבער פרייליכע שמחת השבע ברכות איז פארגעקומען דעם מאנטאג בחצר הקודש גור, נאכפאלגענדיג די שמחת החתונה פון א אייניקל ביי כ"ק אדמו"ר מגור שליט"א, עלטסטע זון ביים רבינ'ס זון הגה"צ ר' שלמה צבי אלתר שליט"א, וועלכער שטייט אין שפיץ פון די אירגון היתומים דחסידי גור, און גיבט זיך אפ מיט זיי ממש ווי א טאטע.
צום שבע ברכות וואס איז פארגעקומען אין די שטיבלעך בבנין ביהמ"ד הגדול דחסידי גור אין ירושלים, זענען געלאדנט געווארן די יתומים פון חסידי גור, אינאיינעם מיט די חשובע עסקנים וואס גיבן זיך אוועק פאר די ארגענעזאציע דורכאויס די יאר. אין א היסטארישע שריט איז כ"ק אדמו"ר מגור שליט"א געזעסן ביים שמחה פאר גאנצע דריי שעה, און זיך מיטגעפריידט אינאיינעם מיט די קינדערלעך די יתומים מיט א אויסערגעווענליכע התרגשות.
דורכאויס די סעודה האבן אלע יתומים געהאט די זכיה אריבערצוגיין וואונטשן לחיים פארן רבי'ן פערזענליך, און אנדערש ווי געווענליך האט דער רבי זיך אויפגעשטעלט טאנצן אינמיטן די סעודה, ווען אלע משתתפים הייבן זיך אינאיינעם אין לעבעדיגע ריקודין.
