די הנהלה פון איחוד מוסדות גור האט אין די יעצטיגע טעג געמאלדן די ענדגילטיגע פלענער איבער די היי יעריגע ועידה, וואס נעמט אריין הונדערטער תומכים נכבדים פון איבער די גאנצע וועלט, וואס וועט אי"ה פארקומען די קומענדיגע וואך פרשת חיי שרה אין לאנד קפריסין, מיט די פערזענליכע באטייליגונג פון כ"ק אדמו"ר מגור שליט"א.
די יעצטיגע ועידה איז די צוועלפטע אין צאל, נאך עלף געלונגענע ועידות וואס איז געפראוועט געווארן אין לויף פון די פארגאנגענע יארן, ווען די גבירים נכבדים קומען זיך צוזאם אין א פראכטפולע לאקאל אויף א רייכע פארברענג פון עטליכע טעג. די לעצטע פאר יאר איז עס נישט פארגעקומען ווי געווענליך צוליב די קאראנע עפאכע און די מלחמה אין ארץ ישראל.
די היי יעריגע ועידה וועט פארקומען די קומענדיגע וואך פרשת חיי שרה אין לאנד קפריסין, אין א קאמפלעקס פון הערליכע רייכע און עלעגאנטע געביידעס על שפת הים, עס וועט זיך אנהייבן דאנערשטאג כ' חשון, און וועט זיך פארציען פאר דריי טעג ביז זונטאג כ"ג חשון, אריינגערעכנט א זעלטן געהויבענע שבת בצילא דמהימנותא פון כ"ק אדמו"ר מגור שליט"א, וועלכער וועט פארברענגען אינאיינעם מיט די נדיבים בעם, און פראווענען דעם שבת אויף א אייגענארטיגע פארנעם כשהמלך בשדה.
אויף א ערשטמאליגע פארנעם וועלן די נדיבים האבן די זכיה צו פארן אויפן פליגער צוזאמען מיט כ"ק אדמו"ר מגור שליט"א, א ספעציעלע טשארטער פליגער איז באשטעלט געווארן פאר די רייזע פון ארץ ישראל קיין קפריסין, און די נדיבים פון אנדערע לענדער וועלן קומען צו פליען מיט אנדערע פליגערס מכל מקומות מושבותיהם.
דאנערשטאג נאכמיטאג וועט מען אנקומען צו די פראכטפולע אליסיום האטעל אין פאפוס סייפרוס, און דאן וועט פארקומען די פראכטפולע אויפנאמע וואו די באטייליגטע וועלן אריבערגיין שלום נעמען ביים רבי'ן. דורכאויס די נאכפאלגענדע טעג וועט פארגעשטעלט ווערן הערליכע פראגראמען און פרעזענטאציעס איבער די מאסיווע בליה און וואוקס פון ממלכת בית גור אלוועלטליך.
