אין די יעצטיגע טעג איז באשטעטיגט געווארן די פלענער אויף א פרישע מסע הגדולים, דאסמאל צום עיר הבירה לאנדאן, ווען א רייע גדולי הדור וזקני ראשי הישיבות וועלן ווידער נעמען דעם וואנדער שטעקן און זיך ארויסלאזן אין גלות, צו שאפן גרויסע סכומים פארן קרן עולם התורה, צו פינאנצירן די ישיבות און כוללים אין ארץ ישראל, אין ליכט פון די שרעקליכע גזירה פון גיוס בני הישיבות וואס האט דראסטיש געשניטן די רעגירונג שטיצע פאר די ישיבות און כוללים.
די קומענדיגע נסיעה איז געפלאנט אויף קומענדיגן סוף חודש אלול, אנהייב וואך פון פרשת נצבים, אין די טעג וואס מען הייבט אן זאגן סליחות איבער דער גארער וועלט לקראת די ימים הנוראים הבעל"ט, די גדולי הדור וועלן ארויספארן פון ארץ ישראל ביום א' סליחות זונטאג פרשת נצבים, און זיין צוגאסט אין שטאט לאנדאן והגלילות פאר צוויי טעג, וואו עס וועט פארקומען א רייכע פראכטפולע מסיבות מיט די ארטיגע נגידים ושועים, וואס וועלן זיך אנשליסן אלס שותפים נכבדים אין דעם הייליגן מצוה.
לויטן פלאן וועלן אנטייל נעמען אין די נסיעה די צוויי זקני גדולי הדור, מרנן ורבנן ראשי ישיבת סלאבאדקע, הגאון הגדול רבי דוב לאנדא, און הגאון הגדול רבי משה הלל הירש שליט"א. כ"ק אדמו"ר מראחמיסטריווקא שליט"א, הגאון הגדול המשגיח רבי דן סגן שליט"א, הגאון המקובל רבי שמעון גלאי שליט"א, הגאון הגדול רבי דוד כהן שליט"א ראש ישיבת חברון, און הגאון הגדול רבי יעקב הלל שליט"א ראש ישיבת אהבת שלום.
די מעלדונג קומט גענוי א יאר נאך די מוצלח'דיגע נסיעה וואס די גדולי הדור האבן אונטערגענומען קיין לאנדאן, אין חודש תמוז תשפ"ד, און אויפגעטריבן ריזיגע סכומים לטובת די קרן עולם התורה, וואס האט געגעבן דעם שטופ פאר די ישיבות און כוללים בארצינו הקדושה צו קענען אנגיין אויפן פינאנציעלן פראנט.
