מטעם בית כ"ק אדמו"ר מגור שליט"א איז געמאלדן געווארן אז דער רבי שליט"א וועט אפרעכטן א ספעציעלע שבת מיט נדיבים בעם, וואס וועלן ביישטייערן פון הונדערט טויזענט דאללער און העכער, פארן קרן מוסיף והולך וואס טוט שטיצן די טויזענטער לומדי תורה אין ראם פון אירגון "מזומנים".
די ספעציעלע קרן איז געגרינדעט געווארן מיט דריי יאר צוריק, ווען עס איז פארגעקומען די גרויסע ועידה אין שטאט נתני', מיטן ציהל אוועקצושטעלן א קביעות'דיגע תמיכה פאר די טויזענטער לומדי תורה, די תלמידי חכמים וואס פארהערן זיך הונדערטער בלעטער אין ראם פון די מזומנים רעוואלוציע.
אצינד איז באשטעטיגט געווארן אז די אלע גורער עשירים וואס וועלן זיך אנשליסן מיטן סכום פון הונדערט טויזענט דאללער און העכער, לטובת דעם קרן מוסיף והולך, וועלן האבן די זכיה צו מיטהאלטן א געהויבענע שבת בצל הקודש כשהמלך בשדה, אינעם רבינ'ס אכסניא אין מושב אורה נעבן ירושלים, וואו דער רבי וויילט אצינד אויף אפרוה.
