אלפי חסידי גור זענען איינגעהילט אין שמחה והתרגשות נאך וואס עס זעהט זיך אן א שטארקע שינוי לטובה אינעם מצב הבריאות פון כ"ק אדמו"ר מגור שליט"א, ווען נאך א צייט אפשניט פון צוויי חדשים איז דער רבי ב"ה ערשינען אין גרויסן בית המדרש צום דאווענען בפני קהל ועדה, און צו די ערשטע סליחות במוצאי מנוחה.
דער רבי שליט"א איז געווען אינדערהיים זינט פארלאפענעם שבת נחמו, ווען דער רבי איז ל"ע אומגעפאלן און זיך צובראכן א וויכטיגע ביין, דורכאויס די פאר וואכן האט זיך דער רבי ערהוילט ב"ה מיט בעסערע טעג, און נישט אזוינע גוטע ל"ע, אבער אצינד זעהט זיך אן א שטארקע פארבעסערונג ב"ה א דאנק תפילות ישראל, און פרייטאג צונאכטס איז דער רבי אריינגעקומען צום דאווענען אין ביהמ"ד הגדול דחסידי גור אין ירושלים.
מפאת חולשתו איז דער רבי געזעסן ביים דאווענען, אבער די חסידים האבן געהאט די געלעגנהייט לחזות בפני הקודש. מוצאי שבת קודש איז דער רבי ווידער אריינגעקומען צום ערשטן סליחות ברוב עם הדרת מלך, ווען די היכל בית המדרש איז איבערגעפולט מקצה און קצה מיט טויזענטער חסידים, וואס דאנקן און לויבן דעם אויבערשטן אויף די גרויסע חסדים.
