טראגענדיג דעם שווערן עול פון די ישיבות און כוללים בארץ הקודש, וואס פלאגן זיך ליידער מיט די שווערע סאנקציעס אין ליכט פון די גזירת הגיוס, וואס ברענגט א פינאנציעלע יאך פאר די ישיבות הקדושות, וועלן די גדולי הדור בארץ הקודש ווידער נעמען דעם וואנדער שטעקן די וואך, און ארויספארן אין די מרחקים אויפצוטרייבן פרישע געלטער לטובת די וועלט בארימטע "קרן עולם התורה" וואס שענקט פינאנציעלע הילף פאר די ישיבות און כוללים.
די יעצטיגע נסיעה וועט זיין קיין לאס אנדזשעלעס קאליפארניע, וואו די גדולי הדור וועלן זיך אויפהאלטן פאר דריי טעג, פון דעם מאנטאג פרשת וישלח ביז מיטוואך הבעל"ט, אפשטאטן באזוכן בהיכלי תורה אין שטאט, מחזק זיין דעם ארטיגן אידנטום, און ארויפגיין לבתי נגידים ושועים אהיימצוברענגען הילף קיין ארץ ישראל די לומדי תורה זאלן ווייטער קענען זיצן און לערנען מיט הרחבת הדעת.
לויטן פלאן וועלן אנטייל נעמען אין די נסיעה די פאלגענדע ראשי הישיבות, הגאון הגדול רבי משה הלל הירש שליט"א ראש ישיבת סלאבאדקע וועלכער האט געוויילט די לעצטע צוויי וואכן אין ניו יארק און ניו דזשערזי לטובת ישיבת סלאבאדקע, הגאון הגדול רבי ארי' מלכיאל קאטלער שליט"א ראש ישיבה בית מדרש גבוה ד'לעיקוואד, הגאון הגדול רבי יחיאל מיכל זילבער שליט"א ראש ישיבת זוועהיל, הגאון הגדול רבי יעקב הלל שליט"א ראש ישיבת אהבת שלום, הגאון הגדול רבי יוסף חברוני שליט"א מראשי ישיבת חברון, און הגאון הגדול רבי חיים מרדכי אוזבאנד שליט"א מראשי ישיבת עטרת שלמה.
צום הויכפונקט פון די נסיעה וועט פארקומען א גרויסע מעמד קבלת פנים פאר די גדולי הדור, מיט די באטייליגונג פון טויזענטער תושבי העיר, דעם מאנטאג אויפדערנאכט אין די ריזן סאבאן פעסטונג אין קאליפארניע.
