היינט קומט פאר די גרויסארטיגע חגיגה יובל העשור בחצר הקודש פאפא, אפצוצייכענען צען יאר צו די התייסדות פון מפעל והגית, סדר הלימוד דחסידי פאפא אלוועלטליך. די חגיגה הייבט זיך אן מיט א יום שכולו תורה, נאכגעפאלגט מיט די גרויסארטיגע מעמד סיומי מסכתות וסדרים וואס איז געלערנט געווארן דורך די טויזענטער חסידים, עס קומט פאר אינעם גיגאנטישן מעגא עווענטס קאמפלעקס אין ברוקלין אין ניו יארק.
היינט קומט פאר אין בארא פארק די יערליכע דינער לטובת כולל שומרי החומות לצדקת רבי מאיר בעל הנס, אין זאל עטרת חי' אין שפיץ פון די אדמור"י ורבני העיר, מוקדש לזכר נשמתו פון כ"ק אדמו"ר הרה"ק מסקולען זצ"ל.
היינט קומט פאר די מעמד סיום מסכת סוטה במסגרת הלימוד אהבתי תורתך דחסידי סאטמאר אין מאנסי, עס קומט פאר אין זאל עטרת חי' שרה בבנין תלמוד תורה תורה ויראה ד'סאטמאר אין מאנסי, אין שפיץ פון הגה"צ גאב"ד סאטמאר מאנסי שליט"א.
היינט קומט פאר די מעמד הנחת אבן הפינה פאר די נייע בנין ביהמ"ד אור יהושע קאפיטשניץ אין לעיקוואד, אין שפיץ פון כ"ק אדמו"ר מקאפיטשניץ שליט"א וועלכער איז צוגאסט די טעג אין אמעריקע לכבוד די חתונה פון א אייניקל.
היינט קומט פאר די שמחת הבר מצוה פון א אייניקל ביי כ"ק אדמו"ר מסאטמאר שליט"א, א זון פון זיין איידעם הגה"צ ר' ברוך טייטלבוים שליט"א רב ביהמ"ד ברך משה אין קרית יואל, זון פון הגה"צ גאב"ד וואלאווע שליט"א. – די שמחה קומט פאר אין ביהמ"ד ברך משה אין קרית יואל.
היינט קומט פאר די שמחת פדיון הבן פון א אייניקל ביי כ"ק אדמו"ר מסקווירא מאנסי שליט"א, בן הנולד ביי זיין זון הרב וועלוויל טווערסקי שליט"א, איידעם ביי הגה"צ ר' ישראל פנחס וואגשאהל שליט"א ר"ם בישיבת שער אפרים. – די שמחה קומט פאר אין ביהמ"ד סקווירא אויף טווין עוועניו אין מאנסי.
כ"ק אדמו"ר מזוועהיל שליט"א וועט היינט אויפדערנאכט אפרעכטן די יארצייט טיש לרגל די יומא דהילולא קדישא פון זקינו הרה"ק רבי גדלי' משה מזוועהיל זי"ע, אין ביהמ"ד הגדול זוועהיל אין ירושלים. שפעטער ביינאכט וועט פארקומען די מעמד עלי' לציון על קברו פונעם בעל ההילולא אין שייח באדר.
כ"ק אדמו"ר מגור שליט"א קערט זיך היינט צוריק למעון קדשו אין ירושלים, נאכן וויילן די לעצטע פאר טעג אין קפריסין אינאיינעם מיט די נגידי ותומכי המוסדות.
כ"ק אדמו"ר מתולדות אהרן שליט"א וועלכער איז צוגאסט די טעג אין ניו יארק לרגל די שמחת החתונה פון א אייניקל, וועט היינט אנקומען קיין לעיקוואד פאר די קומענדיגע פאר טעג, און באשיינען א רייע מסיבות און באנקעטן לטובת מוסדותיו הקדושים.
כ"ק אדמו"ר מסערדאהעלי שליט"א קומט היינט אן אויף א באזוך פון עטליכע טעג קיין קרית יואל, אויפצוטרייבן סכומים אדירים לטובת די סערדאהעלי ישיבה, די אכסניא איז אין שטוב פון הנגיד החסיד ר' עקיבא הערש קליין הי"ו. היינט אויפדערנאכט וועט דער רבי שליט"א אויפטרעטן מיט א דרשת התחזקות אין ביהמ"ד הגדול אין קרית יואל.
כ"ק אדמו"ר מקהל חסידי ירושלים שליט"א וועלכער איז צוגאסט די טעג אין ניו יארק לטובת מוסדותיו הקדושים, וועט היינט אנקומען קיין וויליאמסבורג פאר די קומענדיגע פאר טעג, און באשיינען א רייע מסיבות און באנקעטן לטובת מוסדותיו הקדושים, די אכסניא איז אין שטוב פון הנגיד החסיד ר' שמעון ישראל פערלמוטער הי"ו.
הגה"צ אבד"ק צאנז ארה"ב שליט"א קומט היינט אן צוגאסט קיין ניו יארק אויף א לענגערע באזוך בקרב בני קהילתו חסידי צאנז בארה"ב, היינט קומט פאר די מעמד הכנסת ספר תורה וואס ווערט אריינגעגעבן צום תלמוד תורה דרכי אבות דחסידי צאנז אין בארא פארק, אינאיינעם מיט א פראכטפולע דינער לטובת די צאנזע חדר אין בארא פארק.
צו די פטירה פון הרבנית הצדיקת מסאסרעגען ע"ה, אשת חבר כ"ק אדמו"ר מסאסרעגען זצ"ל, זיצן שבעה די קינדער בני המשפחה אין ספינקא בית המדרש אויף די אכצנטע עוועניו אין בארא פארק, די דריי זיהן הגה"צ אבד"ק באבוב 45 שליט"א, כ"ק אדמו"ר מבריזדוביץ שליט"א, און הגה"צ ר' חיים יצחק רובין שליט"א אדמו"ר מקאלאמייא, און די טאכטער הרבנית מספינקא תליט"א, אשת חבר כ"ק אדמו"ר מספינקא שליט"א.
אריינצושיקן מודעות און נייעס, שיקט אן אימעיל צו NEWS@JDNMAIL.COM
