די היסטארישע עצרת המיליאן מיטן נאמען "זעקת התורה" האט דעם היינטיגן טאג ח' חשון צוזאמגעברענגט אלופי אלפי ישראל, כלל ישראל איז ארויסגעקומען מיט די שענסטע קאלירן לקדש שם שמים, אויסצושרייען א פאראייניגטע קול מחאה קעגן די רדיפת הדת, און א געמיינזאמע שטעלונג צו האלטן פעלזן פעסט די פרישע דור נישט אריינצוגיין אין מיליטער.
אין די פריע פארמיטאג שעה'ן ווען די ירושלימער גאסן האט שוין געווירבלט מיט צענדליגע טויזענטער אידן, האט זיך אנגעזעהן א געוואלדיגע קידוש השם ווען אלע בתי מדרשים און היכלי הישיבות אין די אומגעגנט זענען געווען פול געפאקט מיט לומדים, וואס האבן אויסגענוצט די ליידיגע שעות זייענדיג שוין אין ירושלים, צו לערנען די הייליגע תורה וואס איז מגינא ומצלא.
צום באשטימטן צייט האלב נאך צוויי נאכמיטאג, האט מען אנגעהויבן תפילת מנחה ברוב עם, ווען אלס שליח ציבור דינט הרב החסיד ר' ישי מאנדל הי"ו מחשובי חסידי בעלזא. דערנאך האט מען אנגעהויבן אמירת תהלים בהתעוררות רב, פארגעזאגט דורך עטליכע בעלי תפילה איינגעטיילט לויט פארשידענע קרייזן און נוסחאות, אנגעהויבן דורך הגאון הגדול המשגיח רבי דן סגל שליט"א. דערנאך האט מען געזאגט סליחות, פארגעזאגט דורך הגאון הגדול רבי אברהם סאלים שליט"א, הגאון הגדול רבי ראובן אלבז שליט"א, און נאך גדולי ישראל.
הגה"צ המשפיע ר' אלימלך בידערמאן שליט"א מלעלוב האט פארגעזאגט די תפילה פון אבינו מלכנו חזן וקהל, הגאון החסיד ר' שלמה ברוך פריזאנד שליט"א דער לעגענדארער בעל תפילה בחצר הקודש באיאן האט פארגעזאגט תהלים און געבלאזן שופר, הגאון המקובל רבי יעקב עדס שליט"א האט געזאגט קדיש מיט א זעלטענע התעוררות, און נאך קבלת עולם מלכות שמים וואס האט אפגעהילכט מסוף העולם ועד סופו, האט מען פארגעליינט די החלטת העצרת וואס שטעלט אוועק די פונדאמענט פון כלל ישראל, די תורה הקדושה איז אונזער לעבן, און פון דעם דרך המסורה וועט מען זיך נישט אוועקרירן.
