בחצר הקודש באבוב 45 איז געמאלדן געווארן פרייליכע נייעס, אז בעז"ה דעם קומענדיגן שבת קודש פרשת במדבר הבעל"ט, שבת פאר יו"ט שבועות, וועט כ"ק אדמו"ר מבאבוב 45 שליט"א פראווענען א געהויבענע שבת אין די קאנטרי בערג כשהמלך בשדה, אינאיינעם מיט די חשובע תומכים ונדיבים וואס שליסן זיך אן מיט גרויסע סכומים צום אפקויף פון די נייע יונגל קעמפ.
ווי ברייט באריכטעט מיט עטליכע וואכן צוריק, איז די הנהלת המוסדות אין א מזל'דיגע שעה אריין אין קאנטראקט אויף א דרייסיג מיליאן דאללערדיגע מקח, אפצוקויפן א גיגאנטישע קעמפ אין ראקהיל ניו יארק, א ריזן קאמפלעקס וואס וועט דינען אלס פאסיגע אכסניית קבע פאר די יונגל קעמפ מחנה בני באבוב 45, וואס איז שוין פאר צוואנציג יאר פארוואגלט אין געדונגענע לאקאלן אן קיין געהעריגע קביעות.
פארגאנגענעם מיטוואך איז פארגעקומען א גרויסארטיגע אסיפה אין ביהמ"ד הגדול באבוב 45, וואו מען האט געלאזט אין גאנג די "מבצע המחנה" אויפצוטרייבן די נויטיגע געלטער צו קענען פאראויסגיין מיטן פראיעקט, די קינדערלעך זאלן שוין קענען אריינגיין אין די נייע קעמפ קומענדיגע יאר זוממער תשפ"ז.
דעריבער איז געמאלדן געווארן אז די אלע נדיבי לב וואס שליסן זיך אן מיט א גרויסן סכום געלט פאר דעם יעצטיגן קאמפיין, וועלן האבן די זכיה מיטצוהאלטן א געהויבענע שבת מיטן רבי'ן אויף די בערג, וואס וועט פארקומען קומענדיגן פרשת במדבר שבת בעפאר שבועות, שבת מברכים חודש סיון הבעל"ט.
