אידישע קינדער בכל מקומות מושבותיהם אין אלע עקן וועלט, זענען מקדיש דעם היינטיגן טאג צו איינרייסן וועלטן, מתפלל זיין און מעורר רחמים זיין לרפואת כ"ק אדמו"ר מוויזניץ שליט"א וואס רבים צריכים לו, אין די צייט וואס דער רבי גייט אריבער א קאמפליצירטע און גורל'דיגע אפעראציע אינעם ווייטן לאס אנדזשעלעס, מיטן האפענונג צו קענען היילן דעם רבי'ן פון די ביטערע מחלה ה"י, דער רבי זאל צוריקקומען צו די כוחות ווי אמאל און ווייטער קענען משפיע זיין פאר עדת צאן מרעיתו וכל בית ישראל.
מטעם בית דין צדק אין שיכון וויזניץ בני ברק איז באשטימט געווארן אויף היינט מאנטאג א יום תפילה ותענית, ווען אלע חסידים וועלן פאסטן א האלבע טאג און זיך צוזאמקומען אין די בתי מדרשים און מקומות הקדושים ברוב עם אויסצוזאגן ספר תהלים און מעתיר זיין לרפואתו השלימה פונעם רבי'ן, כ"ק מרן ישראל בן לאה אסתר בתוך שאר חולי ישראל, והן קל כביר לא ימאס תפילת הרבים.
היינט י"ז אדר געפאלט די צוואנציגסטע הילולא קדישא פון כ"ק אדמו"ר מאלכסנדר זצ"ל בעל אמרי מנחם, בנו הגדול ממלא מקומו כ"ק אדמו"ר מאלכסנדר שליט"א וועט ארויפגיין צום ציון הק' היינט נאכמיטאג בראש קהל חסידיו, און שפעטער פארנאכטס אפרעכטן די יארצייט טיש בבית מדרשו אין בני ברק.
לרגל די יארצייט פון מרן שר התורה הגאון האדיר רבי חיים קנייבסקי זצ"ל וואס איז אויסגעפאלן דעם שבת קודש שושן פורים, וועט היינט פארקומען א תפילת רבים ביים ציון הק' אויפן פאנאוויטשער בית החיים אין בני ברק, אין שפיץ פון הגה"צ רבי שמעון גלאי שליט"א.
הגה"צ רבי אברהם יצחק וואלפסאן שליט"א אבד"ק אמונת ישראל וועלכער איז צוגאסט די טעג אין ארץ ישראל לכבוד פורים המשולש, וועט היינט אנקומען קיין עיה"ק טבריה אויף א תפילת רבים ביים ציון הק' פון אביו הגדול מרן המשגיח הגה"צ רבי משה וואלפסאן זצ"ל אבד"ק אמונת ישראל, און שפעטער ביינאכט אנקומען אויף א תפילה ביים ציון הק' פון התנא האלקי רבי שמעון בר יוחאי אין אתרא קדישא מירון.
אריינצושיקן מודעות און נייעס, שיקט אן אימעיל צו NEWS@JDNMAIL.COM
