היינט מיטוואך אינדערפרי איז כ"ק אדמו"ר מוויזניץ שליט"א פון לאנדאן אריינגעפארן צו די קארנעל שפיטאל אין מאנהעטן, וואו דער רבי גייט אריבער א מעדיצינישע פראצעדור אויפן קאפ צו פארגרינגערן דעם רבינ'ס געזונט צושטאנד.
דער רבי שליט"א איז דעם זונטאג אנגעקומען צוגאסט קיין ניו יארק צו באשיינען די שמחת החתונה בחצרות וויזניץ - קאלוב, די חתן א אייניקל פון זיין שווער כ"ק אדמו"ר מקאלוב שליט"א, מיט די כלה א אייניקל ביי אחיו הגדול כ"ק אדמו"ר מוויזניץ שליט"א פון מאנסי, זייענדיג דא אין ניו יארק איז דער רבי געווען אויף א רוטינע אונטערזוכונג אין שפיטאל, נאך וואס דער רבי איז אריבער דאהי אין ניו יארק א מעדיצינישע פראצעדור מיט א יאר צוריק, וואס האט ב"ה שטארק ארויסגעהאלפן דעם רבי'ן אין פארשידענע הינזיכטן.
אצינד איז באשלאסן געווארן דורך די הויכראנגיגע פראפעסארן אז עס איז ראטזאם צו דורכפירן נאך א מעדיצינישע פראצעדור צו פארגרינגערן דעם רבינ'ס געזונט צושטאנד, און היינט מיטוואך נאך תפילת שחרית כוותיקין איז דער רבי אריינגעפארן צו די קארנעל שפיטאל וואו עס ווערט דורכגעפירט די פראצעדור מיטן האפענונג אויף גרויס הצלחה.
לויטן פלאן וועט דער רבי שליט"א פארבלייבן אין ניו יארק פאר נאך א וואך, איידער ער וועט זיך אומקערן למעון קדשו אין לאנדאן, כלל ישראל איז מתפלל פאר כ"ק מרן דוד בן סימא מירל בתוך שאר חולי ישראל.
