שטייענדיג עטליכע וואכן בעפאר שבת נחמו, ווען עס ווערט אפגעצייכנט די יום הצלה והשחרור פון כ"ק האדמורי"ם מסקולען זכותם יגן עלינו, און ווערט יאר יערליך געפראוועט מיט גרויס שמחה והתרגשות דורך פילצאליגע חסידים ומעריצים לבית סקולען, איז אצינד באשטעטיגט געווארן אז דאס יאר וועט די גרויסע סעודת הודאה דורך כ"ק אדמו"ר מסקולען שליט"א פון וויליאמסבורג פארקומען אין די פראכטפולע המספיק רעזארט אין די קעטסקילס.
דער סקולענער רבי פון וומס"ב וועלכער איז היינט דער עלטסטער פון די ברידער און פלומעניקעס האדמורי"ם, זינט די הסתלקות פון כ"ק אדמו"ר הרה"ק מסקולען זצ"ל בעל ישועת יעקב, האט אין די לעצטע פאר יאר געפראוועט דעם סעודת הודאה אין קרית יטב לב אין בלומינגבורג, צו וואו עס פלעגן קומען צו פארן פילע ידידים ומעריצים, זיך דערווארעמען בצילא דמהימנותא בשעות של קורח רוח מוצאי שבת נחמו.
נאך וואס דער ציבור המשתתפים איז שטארק געוואקסן בליעה"ר און מען האט געזוכט א גרעסערע לאקאל אין די קאנטרי וואו צו פראווענען דעם סעודת הודאה, איז דאס יאר ארויסגעדינגען געווארן די פראכטפולע זאל פון המספיק רעזארט אין ראקהיל, אין צענטער פון די היימישע קעטסקילס וואו צענדליגע טויזענטער אידן האלטן זיך אויף דורכאויס די זוממער וואכן, און דארט וועט דאס יאר געפראוועט ווערן דעם סעודת הודאה אין שפיץ פונעם רבי'ן.
