חסידי וויזניץ וויליאמסבורג זענען איינגעהילט אין גרויס התרגשות, נאך וואס כ"ק אדמו"ר מוויזניץ שליט"א פון וויליאמסבורג האט אויפגענומען בנו יחידו הגה"צ ר' חיים מאיר האגער שליט"א אלס רב הקהילה אין מאנסי, צו שטיין אין שפיץ פון די קהילה און פירן אלע רוחניות'דיגע אנגעלעגנהייטן כיד ה' הטובה עליו.
הגה"צ ר' חיים מאיר שליט"א וועלכער איז דעם רבינ'ס איינציגער זון, אן איידעם ביים פעטער כ"ק אדמו"ר מוויזניץ שליט"א פון בית שמש, האט פאר לאנגע יארן געוואוינט אין מאנסי וואו ער האט זיך געווייקט בצלו פון זיין גרויסן זיידן הרה"ק בעל תורת מרדכי מוויזניץ זצ"ל, און געשטיגן בדרכי התורה והיראה.
אצינד מיט די בליה און וואוקס פון די קהילה "תורת מרדכי" דחסידי וויזניץ וויליאמסבורג אין מאנסי, מיטן אפקויף פון א פרישע געביידע אוועקצושטעלן דעם ביהמ"ד אין א משכן קבע, האט דער רבי שליט"א אויפגענומען דעם רב שליט"א לכהן פאר אין שפיץ פון די קהילה, און באגלייטן די חברי הקהילה אויף טריט און שריט.
דעם פארגאנגענעם דאנערשטאג אויפדערנאכט ביים גרויסן כינוס יסוד איתן אוועקצושטעלן א יסוד פארן קרן הבנין פון די נייע ביהמ"ד, וואס איז פארגעקומען אין זאל עטרת גינענדל אין מאנסי, האט דער רבי שליט"א ביי די דברות קודש געמאלדן פאר די חסידים די פריידיגע בשורה, אז ער האט ממנה געווען זיין זיין הגה"צ ר' חיים מאיר שליט"א צו זיין דער "איש על העדה", אינזין צו האבן דעם ציבור ברוחניות ובגשמיות. לעת עתה קומט ער איינמאל אין פיר וואכן אויף שבת און איין טאג אין די וואכן, און בעז"ה וועט עס ניתוסף ווערן באופן קבוע.
דער רבי שליט"א האט זיך אויסגעדרוקט אז ער איז טאקע ראוי לאותו איצטלא, און דער אויבערשטער זאל העלפן אז די זכות אבות זאל אים באגלייטן, מיט סייעתא דשמיא, ער זאל קענען אויפטון בהרבצת התורה און יראת שמים, ער זאל זיין א עזר פאר די קהילה און פארן ציבור ברוחניות ובגשמיות.
רעקארדירונג פון די דברות קודש פון האדמו"ר מוויזניץ פון וומס"ב, וואו דער רבי מעלדט איבער די אויפנאמע פון בנו יחידו הגה"צ ר' חיים מאיר אלס רב הקהילה אין מאנסי
