מיטוואך 1:45 נאכמיטאג
כ"ק אדמו"ר מוויזניץ שליט"א פון מאנסי פארלאזט יעצט די בית החיים נאכן ענדיגן די לוויה, אויך האבן זיך באטייליגט ביי די לוויה כ"ק האדמורי"ם מבית שמואל צבי ספינקא און בריזדוביץ שליט"א.
-------------------
מיטוואך 1:35 נאכמיטאג
יעצט נאך סתימת הגולל און קדיש דורך די קינדער, קומען די אבלים ארויס פונעם אהל, וואו הארט דערנעבן ליגן באערדיגט הגה"צ אבד"ק אוהעל זצ"ל וזוגתו הרבנית ע"ה, די עלטערן פון די וויזניצע רעבעצין ע"ה. די חסידים זענען אויסגעשורה'ט אויף ביידע זייטן און זענען מנחם די אבלים.
--------------------
מיטוואך 1:20 נאכמיטאג
מען האט יעצט געענדיגט די קבורה, און מען האלט אינמיטן סתימת הגולל. אינעם אהל געפונען זיך האחים האדמורי"ם מוויזניץ שליט"א, דער פעטער און מחותן כ"ק אדמו"ר מסקווירא שליט"א, און כ"ק אדמו"ר מסקווירא ב"פ שליט"א.
---------------------
מיטוואך 1:00 מיטאג
די מיטה איז יעצט אנגעקומען צום בית החיים, כ"ק אדמו"ר מסקווירא שליט"א באטייליגט זיך ביי די קבורה אויפן בית החיים.
---------------------
מיטוואך 12:30 מיטאג
מען באגלייט ווייטער אויף רוט 306 אין ריכטונג פונעם בית החיים, עס זעהן זיך אן כ"ק האדמורי"ם מראחמיסטריווקא, סקווירא ב"פ, קאליש, און סוליצא, אב"ד פאפא ב"פ, אב"ד ווענגרוב, און אב"ד בערטש.
---------------------
מיטוואך 12:22 מיטאג
מען האט יעצט געענדיגט רייסן קריעה, הרה"ג ר' יחיאל שטיינמעטץ שליט"א האט פארגעזאגט קל מלא רחמים, און מען הייבט אן באגלייטן ארויף די גאס.
מיטוואך 12:15
מען האט יעצט געענדיגט די הקפות, דער וויזניצער רבי שליט"א די קינדער און די ברידער רייסן קריעה אצינד, צווישן אנדערע זענען אנוועזנד כ"ק האדמורי"ם מסאטמאר, וויזניץ פון קייאמישע און ירושלים, ראחמיסטריווקא פון ספרינג וואלי, בארניב, אב"ד סאווראן, און אב"ד גרויסווארדיין.
----------------
מיטוואך 12:10 מיטאג
מען הייבט אן אצינד די הקפות ארום די מיטה, פארגעזאגט דורך הרה"ג ר' יחיאל שטיינמעטץ שליט"א מרבני וויזניץ. צווישן אנדערע זענען אנוועזנד האדמורי"ם מראחמיסטריווקא פון לעיקוואד און אוקענויין, גאב"ד סאטמאר מאנסי, האדמורי"ם משאץ, קאסאן הילקרעסט, זידטשויב פרעמיסלא, און אב"ד קראלי מאנסי.
----------------
מיטוואך 12:00 מיטאג
די מיטה קומט יעצט אן פארנט פון ביהמ"ד הגדול אין שיכון וויזניץ מאנסי.
צווישן אנדערע זעהן זיך אן ביי די לוויה, דער פלומעניק כ"ק אדמו"ר מוויזניץ שליט"א פון בארא פארק, דער שוואגער כ"ק אדמו"ר מניקלשבורג שליט"א, כ"ק אדמו"ר מזוועהיל ארה"ב, לויעוו טשערנאביל פארשעי, הגה"צ אב"ד קהל אברכים, אב"ד פאפא מאנסי, אב"ד באבוב 45 מאנסי, אב"ד מאדא, אב"ד ניימארק, אב"ד שרגא המאיר, הגה"צ ר' אפרים וואקסמאן ראש ישיבת מאור יצחק, הגה"צ ר' חיים שלום האלבערשטאם בן האדמו"ר מבאבוב, און א משלחת פון רבני גור, בשליחות הקודש פון כ"ק אדמו"ר מגור שליט"א
-----------------
מיטוואך 11:50 פארמיטאג
אין די פריערדיגע מינוטן זענען אנגעקומען זיך באטייליגן ביי די לוויה, די שוואגערס כ"ק האדמורי"ם מוויזניץ פון וויליאמסבורג, ביקסאד, און קאסאני, און דער פלומעניק כ"ק אדמו"ר מספינקא מאנסי שליט"א.
-----------------
מיטוואך 11:30 פארמיטאג
די מיטה פארלאזט יעצט ביתו נאוה קודש פונעם וויזניצער רבי'ן, און ווערט געפירט צום פארקינג לאט פון תלמוד תורה וויזניץ בנין ווילחאוויץ, וואו די נשות הקהילה זענען פארזאמלט אפצוגעבן דעם כבוד האחרון.
כ"ק אדמו"ר מסקווירא שליט"א איז יעצט אנגעקומען צום בית החיים אין שיכון סקווירא, אויף א תפילה על קברה פון מחברתו הטהורה הרבנית הצדיקת מסקווירא ע"ה ככלות י"א חודש לפטירתה, אנדערש ווי געפלאנט אויף שפעטער נאכמיטאג, כדי זיך צו קענען באטייליגן ביי די לוויה.
-------------------
מיטוואך 11:20 פארמיטאג
די טראפיק מאפע וואס ראקלענד חברים האט ארויסגעשטעלט, צו ווארענען איבער א שווערע טראפיק אנשטויס אין די אומגעגנט אין לויף פון די לוויה.
מיטוואך 11:10 פארמיטאג
אין די יעצטיגע מינוטן איז די מיטה אנגעקומען לביתו נאוה קודש פון כ"ק אדמו"ר מוויזניץ שליט"א פון מאנסי, וואו עס זענען פארזאמלט די בני המשפחה און געזעגענען זיך פונעם אשת חבר, אם הבנים שמחה. אין צימער זענען אויך אנוועזנד די דריי ברידער, הגה"צ גאב"ד סאטמאר ב"פ שליט"א, הגה"צ אבד"ק אוהעל מאנסי שליט"א, און הגה"צ אבד"ק אוהעל וומס"ב שליט"א.
-------------
פדיון נפש
אין די יעצטיגע שעות ווערט פארטיילט פאר אלע כולל אינגעלייט אין קהילה קדושה וויזניץ, ספעציעלע טשעקס, וואס דער רבי שליט"א פארטיילט אלס פדיון נפש, אזוי ווי עס האט זיך געפירט אביו הגדול הרה"ק בעל תורת מרדכי זצ"ל.
-------------
לחלוק כבוד האחרון
בפקודת הקודש פון כ"ק מרנן האדמורי"ם לבית וויזניץ שליט"א, וועלן אלע ישיבות הקדושות דחסידי וויזניץ פון איבער גרעיטער ניו יארק, ארויספארן קיין מאנסי זיך צו באטייליגן ביי די לוויה, און אפגעבן דעם לעצטן כבוד פאר די חשובע רעבעצין ע"ה, מחברתו הטהורה פונעם וויזניצער רבי'ן שליט"א פון מאנסי. דאס רעכנט אריין די ישיבה הק' בנין אבות וויזניץ אין קייאמישע לעיק, די ישיבה הק' תורת מרדכי וויזניץ אין בלומינגראוו, און די ישיבה הק' תפארת מרדכי וויזניץ אין סטעטן איילענד.
דאס איז אויסער די וויזניצע ישיבות הקדושות אין נייעק, וואס שטייען בנשיאות דער רבי פון מאנסי, און די אלע תלמידי המוסדות אין מאנסי, וואס מען האט אפגערופן די סדרי הלימודים אויף היינט מיטוואך סיי ביי די יונגלעך און סיי ביי די מיידלעך.
מבטלין תלמוד תורה להוצאת המת.
-------------
דרכי שיכון וויזניץ מאנסי אבילות
די ווילעדזש אוו כתר האט געמאלדן איבער א רייע פארשליסונגען וואס וועט זיין אין מאנסי היינט מיטאג אין צייט פון די לוויה, צוערשט וועט פיליס טערעס ווערן גענצליך פארשלאסן שוין עלף אזייגער פארמיטאג, צו קענען צוגרייטן די גאס פאר די טויזענטער ערווארטעטע משתתפים. רוט 306 וואו דער גאנצער עולם וועט באגלייטן צופיס, וועט זיין פארשלאסן פון ארום צוועלף אזייגער, ביז מען ענדיגט באגלייטן די מיטה ביזן בית החיים.
א ספעציעלע ממונה איז געשטעלט געווארן פאר אלעס אנבאלאנגט השתתפות אדמורי"ם ורבנים, די נאמבער צו רופן איז 845-502-6546.
