חסידי מודזיץ באוויינען די ביטערע פארלוסט, מיט די פטירה בשיבה טובה פון הרב החסיד המפורסם ר' שמואל יצחק פייניגשטיין ע"ה, וועלכער האט לאנגע יארן געדינט אלס געטרייער משמש בקודש ביי אדמור"י בית מודזיץ, אנגעהויבן ביי כ"ק אדמו"ר הרה"ק בעל אמרי א"ש ממודזיץ זצ"ל, ביז היינט ביי להבחל"ח כ"ק אדמו"ר ממודזיץ שליט"א.
הרב החסיד ר' שמואל יצחק ע"ה איז געווען איין און אכציג יאר אלט, און איז אויפגעוואקסן אין שויס פון די פריערדיגע צדיקים, זייענדיג פון קינדווייז אן אדוק ומקושר צו די מודזיצער רביים. מיט צענדליגע יארן צוריק איז ער געווארן אויפגענומען אלס משמש בקודש ביים מודזיצער רבי הרה"ק בעל אמרי א"ש זצ"ל, וועם ער האט באדינט מיט גרויס געטריישאפט.
דורכאויס די שנות המלוכה פון כ"ק אדמו"ר ממודזיץ זצ"ל בעל נחלת דן איז ער אלע יארן געשטאנען צו זיין רעכטע האנט און געהאט א באדייטענדע טייל צו באגלייטן די קהילה און אלע חסידים מיט אלע באדערפענישן, די לעצטע צוואנציג יאר איז ער ווייטער צוגעשטאנען מיט גרויס געטריישאפט צו בנו ממלא מקומו להבחל"ח כ"ק אדמו"ר ממודזיץ שליט"א, וועלכער האט שטארק געשעצט דעם חשובן משמש בקודש וואס האט נאך עספיעט צו קונה זיין תורה וחסידות פון די פריערדיגע רביים.
יעצט ביינאכט אין ארץ ישראל איז דער גבאי ר' שמואל יצחק נפטר געווארן אין עלטער פון איין און אכציג יאר, לדאבון לב חסידי מודזיץ איבער די גאנצע וועלט וכל משפחתו היקרה, די לוויה וועט פארקומען מארגן מיטוואך עלף אזייגער פארמיטאג פון זיין שטוב אין די גני גד געגנט אין בני ברק, דערנאך ביים גרויסן מודזיצער בית המדרש אויף רחוב חבקוק, אויפן וועג צום בית החיים ירקון אין פתח תקוה וואו ער וועט קומען לקבורה.
