א העלישע פייער וואס האט אויסגעבראכן היינט פרייטאג פארטאגס, האט טאטאל פארניכטעט און חרוב געלייגט א היסטארישע שוהל געביידע אין ראטערפארד ניו דזשערזי, די בית קל שוהל און די לאקאלע חב"ד שוהל וואס האבן זיך געפונען אין די געביידע.
די פייער האט אויסגעבראכן ארום א פערטל צו דריי פארטאגס, און באלד איינגעהילט די גאנצע געביידע אין פלאמען, פארכאפנדיג דריי געביידעס וואס נעמט אריין די בית קל שוהל, וואס ציהט שוין א היסטאריע פון איבער הונדערט יאר, און א חב"ד שוהל וואס איז געווען שטארק פארנומען אין די געגנט.
דער חב"ד רב הרב יצחק לערמאן שליט"א האט געוואוינט מיט זיין משפחה דארט אינעם בנין, און ווען די פייער האט אויסגעבראכן האבן אלע פאמיליע מיטגלידער ב"ה באוויזן ארויסצולויפן אן קיין וואונדן, אבער זיי זענען געבליבן אן א דאך איבערן קאפ, ווען ארום א שעה נאך וואס די פייער האט אנגעהויבן ברענען, האט די גאנצע געביידע צוזאמגעפאלן פון די שרעקליכע פלאמען און די געשעדיגטע סטרוקטור.
לעבעדיגע ווייערס זענען געווען נעבן די געביידע, און האט צוגעברענגט א ערנסטע זארג ביי די פייער מארשאלס, גאר אסאך פייערלעשער האבן געארבעט צו פארלעשן די פלאמען, און געווען אויפן סצענע פאר עטליכע שעה צו פארזיכערן אז מענטשליכע לעבנס זענען נישט אין געפאר, און די פייער פארשפרייט זיך נישט צו נאך ארומיגע געביידעס.
