מיט גרויס צער און טרויער איז אנגעקומען היינט צופרי די ביטערע בשורה, איבער די פטירה פון הגה"צ רבי יוסף יהושע העשיל בלום זצ"ל גאב"ד קרית קאשוי, נאך א קורצע קראנקהייט רח"ל, אין עלטער פון צוויי און זיבעציג יאר.
דער רב זכר צדיק לברכה איז געווען דער אכטער זון פון הגה"ק מקאשוי זצ"ל בעל ברכת שמים, און און איז אויפגעוואקסן אויפן שויס פון זיין גרויסן פאטער וועלכער האט משפיע געווען אויף אים תורה חסידות און יראת שמים, אים מדריך געווען להוראה און אריינגעברענגט בעולם הרבנות.
שוין פאר צענדליגע יארן צוריק איז דער רב זצ"ל געווארן אויפגענומען אלס דיין ומורה צדק אין קאשויער שטעטל אין בעדפארד היללס, דער רב זצ"ל פלעגט פארלערנען שיעורי תורה תמידין כסדרן, קביעות'דיגע שיעורים מדי יום ביומו ומדי שבת בשבתו, להורות את דבר ה' זו הלכה און צוצוגרייטן צו יעדן יום טוב מיט די פאסיגע הכנה.
דער רב זצ"ל איז געווען באקאנט מיט זיין איידלקייט און ענוות חן, קיינמאל געזוכט קיין פירסום נאר אנטלאפן דערפון כמטחוי קשת, ער איז געווען באגלייט מיט א זעלטענע אצילות און חן וואס יעדער ארום האט געזעהן אז עס האנדלט זיך פון א געהויבענער איד שטיל און באשיידן. ער איז געזעסן און געהארעוועט בתורה ועבודה שעות ארוכות, און געפירט דעם כולל פאר די אינגעלייט דארט אין שטעטל.
מיט עטליכע יאר צוריק איז ער נתעלה געווארן בכתר הרבנות אלס רב פון דעם שיינעם חסידישן שטעטל אין קרית קאשוי, און האט זיך איבערגעגעבן פאר יעדן איינעם מיט א זעלטענע געטריישאפט, זיך געזארגט פאר יעדן ברוחניות ובגשמיות, און געשטאנען כחומה בצורה קעגן די נסיונות הדור, בדרך אביו הגדול דער קאשויער רב זכר צדיק לברכה. אזוי אויך איז דער רב זצ"ל געווען דער בעל קורא רבות בשנים אין ביהמ"ד הגדול אין קרית קאשוי.
מיט עטליכע וואכן צוריק איז ער ליידער דיאגנאזירט געווארן מיט די ביטערע מחלה ה"י, און נאכן אנהייבן די וואך שווערע באהאנדלונגען איז ער פלוצלינג נפטר געווארן היינט פארטאגס, אין בליענדן עלטער פון 72 יאר, איבערלאזנדיג א הערליכע דור ישרים יבורך, חשובע קינדער און איידימער תלמידי חכמים און חסידישע אינגעלייט.
אויסער דעם לאזט ער איבער זיינע חשובע ברידער האדמורי"ם והרבנים, אויסער די צוויי ברידער וואס זענען שוין ליידער נפטר געווארן אין די לעצטערע יארן, אחיו הגדול כ"ק אדמו"ר בעל שיח חיים מקאשוי זצ"ל, און זיין ברודער הגה"צ ר' אשר יעקב בלום זצ"ל וועלכער איז נאך נפטר געווארן בחיי אביו הגדול.
דער רב לאזט איבער די ברידער להבחל"ח הגה"צ ר' שאול שלום בלום שליט"א, הגה"צ ר' שמואל מאיר בלום שליט"א, הגה"צ ר' משה מנחם בלום שליט"א, כ"ק אדמו"ר מקאשוי שליט"א, כ"ק אדמו"ר מתולדות רפאל קאשוי שליט"א, הגה"צ ר' עקיבא דוד בלום שליט"א, און הגה"צ אבד"ק קאשוי וומס"ב שליט"א.
די מסע הלוויה וועט פארקומען היינט דריי אזייגער נאכמיטאג בהיכל ביהמ"ד הגדול אין קרית קאשוי אין בעדפארד היללס, באותו מקום וואו דער רב זצ"ל האט מרביץ תורה געווען און מדריך געווען אידישע קינדער לתורה ויראת שמים, פון דארט וועט דער רב געפירט ווערן לקבורה אויפן בית החיים אין קרית קאשוי, באוהל אביו הגדול הגה"ק מקאשוי זצ"ל.
זכר צדיק לברכה לחיי העולם הבא.
