מיט אויסטערלישע התרגשות איז דעם מוצאי שבת פארגעקומען אין שטאט מאקאווא די סעודת הודאה ברוב עם הדרת מלך, שטייענדיג א יאר זינט הרב החסיד ר' דוד מרגלי הי"ו דער לעגענדארער עסקן לבית מאקאווא איז געווען פארמישט אין א שרעקליכע עקסידענט נישט ווייט פון מאקאווא, ביומא דהילולא קדישא פון הרה"ק בעל אהל משה ממאקאווא זי"ע.
ווי יאר יערליך איז כ"ק הגה"צ גאב"ד מאקאווא שליט"א ארויסגעפארן בראש קהל חסידיו צום שטאט מאקאווא אין אונגארן, לרגל די יומא דהילולא קדישא פון זקינו הרה"ק בעל אהל משה זי"ע, וואס איז אויסגעפאלן דעם מוצאי שבת קודש י"ז סיון, אין די טעג בעפאר שבת האט דער רבי פוקד געווען עטליכע מקומות הקדושים אין אונגארן, און שבת קודש איז געפראוועט געווארן אויף א געהויבענע פארנעם אין שטאט מאקאווא.
די הויכפונקט פון די נסיעה איז געווען מוצאי שבת קודש ביים סעודת הילולא, וואס איז פארגעקומען אויף א רירנדע פארנעם אינאיינעם מיט די סעודת הודאה דורך הרב דוד מרגלי שליט"א, וועלכער האט דערביי דערציילט זיינע הרגשים נאך די שרעקליכע עקסידענט וואס ער איז אריבער פונקט א יאר צוריק, ווען ער האט געשוועבט בין מוות לחיים פאר עטליכע וואכן אינעם ווייטן אונגארן אין א צוריקגעשטאנענע שפיטאל, ביז ער האט זיך בס"ד ערהוילט און פולקאם צוריקגעקומען צו די כוחות, טראץ אלע שווארצע פאראויסזאגעכצער פון די דאקטוירים.
גאר שטארק איז געווען די מעמד הודאה אויפן מקום הנס, דארט וואו עס האט פאסירט די שרעקליכע עקסידענט נישט ווייט פון מאקאווא, אינעם זעלבן טאג ככלות השנה, מען האט זיך ארויסגעלאזט אין א פייערדיגע טאנץ צו דאנקן און לויבן דעם אויבערשטן אויף די גרויסע חסדים.
