אפדעיט פרייטאג 10:30 פארמיטאג:
די צוויי נפטרים זענען חשובע אינגעלייט פון בארא פארק, איינער איז האברך החשוב הרב ישראל שלום אשרי ע"ה זיבן און צוואנציג יאר אלט מחשובי חסידי בעלזא, א זון פון להבחל"ח הרב יעקב ברוך אשרי שליט"א פון מאנסי, אייניקל פון הגה"צ ר' אפרים אשרי זצ"ל אב"ד קאוונא ורב בית הכנסת הגדול אין ניו יארק, און אייניקל פון הגה"צ ר' עמרם טויב זצ"ל אבד"ק ערוגת הבושם באלטימאר. די לוויה וועט פארקומען היינט מיטאג ארום איינס אזייגער פארנט פון בעלזא שטיבל אויף 39 אין בארא פארק, און ער וועט קומען לקבורה אויפן בית החיים הר שלום אין מאנסי חלקת קהל מחזיקי הדת בעלזא.
דער צווייטער אינגערמאן איז האברך החשוב ר' מנחם מענדיל וויינבערגער ע"ה אכט און צוואנציג יאר אלט, א זון פון הרב החסיד ר' משה וויינבערגער הי"ו, און א אייניקל פונעם באקאנטן גבאי צדקה ושליח מצוה הרב החסיד ר' ברוך יודא שניטצלער ע"ה. די לוויה וועט פארקומען 11:30 פארמיטאג אויפן סאטמארער בית החיים אויף רעיוואוד אין קרית יואל.
ויהי רצון שלא ישמע עוד שוד ושבר בגבולינו, ונשמע ונתבשר בשורות טובות.
----------------
א שוידערליכע עקסידענט האט פאסירט היינט ביינאכט אין די מאונטעינדעיל געגנט אין די קאנטרי בערג, וואו א אידישע קאר האט זיך איבערגעדרייט און אריינגעפאלן צו די זייט פון די ראוד, און נאכדעם ארויף אין העלישע פלאמען פון וואס צוויי אידן זענען ל"ע טראגיש אומגעקומען רח"ל.
די עקסידענט האט פאסירט אויף טשורטש ראוד נישט ווייט פון וואודרידזש, וואו עס איז שארף געדרייט די ראוד מיט א טיפע טאל דערנעבן. עמערדזשענסי אגענטורן זענען אנגעקומען אויפן סצענע און געארבעט צו באפרייען פארכאפטע פון די ברענענדיגע קאר, ליידער איז באשטעטיגט געווארן אז צוויי אידן זענען רח"ל טראגיש אוועקגעריסן געווארן אין די עקסידענט פייער.
יה"ר שנשמע ונתבשר בשורות טובות.
