קומענדיגע וואך פרשת כי תצא וועט כ"ק הגה"צ גאב"ד מאקאווא שליט"א ערשיינען אויף א געהויבענע באזוך אין ניו יארק, לקראת די שמחת החתונה במעון קדשו, די חתן א זון פון זיין זון הגה"צ ר' יואל יצחק לעמבערגער שליט"א, מיט די כלה א טאכטער פון הגה"צ ר' יחיאל מיכל גאלדמאן שליט"א אבד"ק זוועהיל מאנסי.
די ביקור המרומם ברענגט אויף שמחה וחדוה ביי תלמידי וחסידי, ידידי ומעריצי בית מאקאווא בארצות הברית, ווען מ'וועט האבן די געלעגנהייט זיך צו קלאמערן און זיך דערווארעמען לאורו הגדול פונעם רב שליט"א, און מיטהאלטן געהויבענע ימי השמחה בחצר הקודש. קומענדיגן מאנטאג וועט דער רב שליט"א ארויספארן ממעון קדשו אין קרית אתא אויפן וועג קיין ניו יארק, און דורכאויס די באזוך וועט זיך דער רבי אויפהאלטן אין שטאט מאנסי.
מיטוואך אויפדערנאכט וועט פארקומען די גרויסע חתונה אין זאל פון אטריום פלאזא, דאנערשטאג וועט דער רב שליט"א אנקומען אויף א באזוך אין שטאט בארא פארק בקרב חסידיו, צו באשיינען די שמחת החתונה ביי איינער פון די נאנטע חסידים. שבת קודש וועט געפראוועט ווערן אויף א גרויסע פארנעם אין די נייע פראכטפולע זאל תפארת עלקא, אינאיינעם מיט די שמחת השבע ברכות במעון קדשו.
זונטאג אויפדערנאכט וועט פארקומען די צענטראלע שמחת השבע ברכות צוגעשטעלט דורך התאחדות תלמידי וחסידי מאקאווא בארה"ב, מאנטאג אויפדערנאכט וועט דער רבי באשיינען בראש השמחה ביי די גרויסע סאטמארע חתונה אין וויליאמסבורג, אייניקל פון זיין ברודער הגה"צ אבד"ק מאקאווא ב"פ זצ"ל, און דינסטאג כי תבוא וועט דער רב זיך אומקערן אהיים למעון קדשו אין ארץ ישראל.
ווי באריכטעט דא קומט אויך צו פארן חתנו הגדול הגה"צ ר' אהרן מרדכי רוקח שליט"א מבעלזא, צו באשיינען די שמחת החתונה במעון הקודש פונעם רב שליט"א.
