הונדערטער נדיבים ותומכים פון איחוד מוסדות גור, האבן מיטגעהאלטן זעלטן געהויבענע טעג בצל הקודש פון כ"ק אדמו"ר מגור שליט"א, אין ראם פון די גרויסע ועידה פאר די נגידים וואס איז פארגעקומען דאסמאל אין לאנד קפריסין ווי ברייט באריכטעט.
א גאר אייגענארטיגע מעמד איז פארגעקומען דאנערשטאג נאכמיטאג, די ערשטע מעמד פון די יעצטיגע ועידה. די הנהלת האיחוד האט ספעציעל געברענגט צוועלף קינדערלעך פון די גערער מתיבתות, כדי צו קענען אפרעכטן א גרויסע פארהער אויף זייערע לימודים אין ראם פון "מזומנים" מיסודו פונעם גערער רבי'ן. עס איז געווען א גאר געהויבענער מעמד, און טראץ וואס די עסקנים האבן שוין געבעטן דעם רבי'ן צו אנוואונטשן פאר די פארזאמלטע, האט דער רבי געוואלט פארזעצן מיט די פארהער נאך א דריי פערטל שעה. שפעטער ביינאכט זענען די קינדערלעך צוריקגעפארן קיין ארץ ישראל צו זיין אינדערהיים אויף שבת, אין באגלייטונג פון זייערע חשובע מחנכים.
פון די הויפט נגידים לבית גור האט זיך אנגעזעהן דער בארימטער נגיד פון אמעריקע ר' שלמה ווערדיגער הי"ו, ביי די סעודות איז ער געזעסן נישט ווייט פונעם גערער רבי'ן, באלד נאכן רבינ'ס זון הגה"צ ר' נחמיה אלתר שליט"א. דורכאויס די סעודות שבת האט דער רבי גערעדט מיט אים עטליכע מאל, און ביים סעודת ליל שבת קודש איז ער מכובד געווארן מיטן בענטשן.
א ערשטמאליגע ערשיינונג איז געווען ערב שבת נאכמיטאג פארן זמן הדלקת הנרות, ווען דער רבי איז ערשינען אין זאל און געצינדן די שבת ליכט. עס איז געווען דאס ערשטע מאל וואס דער רבי האט געצינדן שבת ליכט ברבים, נאך וואס ביי אלע נסיעות קומט די רעבעצין מיט, און אצינד איז די רעבעצין געבליבן אינדערהיים.
נאכן סעודה איז געווען א ספעציעלע געלעגנהייט פון א שעה צייט, ווען די משתתפים האבן געקענט פרעגן דעם רבי'ן איבער פארשידענע הלכות און מנהגים.
נאך הבדלה איז פארגעקומען א ספעציעלע שיעור דורכ'ן רבינ'ס זון הגה"צ ר' נחמיה אלתר שליט"א, וועלכער האט פארגעלערנט עטליכע מינוט אין ספר הק' ארחות צדיקים, אין ראם פון די נייע סדר לימוד אין ספרי מוסר וואס דער רבי האט איינגעפירט א קורצע צייט צוריק. דער רבי איז געזעסן דערביי און מיטגעהאלטן דעם שיעור.
