אין די יעצטיגע טעג איז געמאלדן געווארן פאר כלל תלמידי וחסידי מאקאווא איבער דער גארער וועלט, אז אין צוויי וואכן ארום וועט כ"ק הגה"צ גאב"ד מאקאווא שליט"א ארויספארן אויף א ספעציעלע מסע הקודש "בני היכלא" קיין פוילין, אינאיינעם מיט די נגידי ותומכי המוסדות, און פראווענען א געהויבענע שבת אין שטאט לובלין.
די נסיעה איז געאייגנט פאר די תומכי המוסדות וואס שליסן זיך אן מיט ווייניגסטנס צוועלף טויזנט דאללער, צו פינאנצירן די מאסיווע פראיעקטן פון הרחבת גבולי הקדושה, אינערהאלב די מאקאווא ישיבה און מוסדות אין קרית אתא, מיסודו פון הגה"ק בעל עטרת משה ממאקאווא זי"ע, אויפן פערזענליכן בקשה פון הרה"ק מבעלזא זי"ע.
די מסע הקודש וועט זיך אנהייבן דאנערשטאג פרשת וארא, ווען דער רב שליט"א וועט זיך ארויסלאזן אינאיינעם מיט די תומכים אויפן וועג קיין פוילין, נאך א קורצע אפשטעל אין ווארשא, וועט מען אנקומען צום היסטארישן שטאט לובלין, וואו די נאסטאלגישע געביידע "ישיבת חכמי לובלין" וועט איינגערישט ווערן אויף א פראכטפולע און עלעגאנטע פארנעם ווי עס פאסט פאר תומכי ומחזיקי תורה.
די גאנצע שבת וועט געפראוועט ווערן דארט אין ישיבת חכמי לובלין, אינעם הייליגן שטאט וואו דער הייליגער חוזה פון לובלין זי"ע האט משפיע געווען לארץ ולדרים, מיט א ספעציעלע מעמד תפילה ביים ציון הק' פונעם הייליגן חוזה זי"ע. מוצאי שבת וועט מען פארזעצן די נסיעה קיין ליזענסק, אויף א תפילת רבים ביים ציון הק' פונעם הייליגן רבי'ן ר' אלימלך זי"ע, דערנאך וועט דארט פארקומען א רייכע סעודת מלוה מלכה אין שפיץ פונעם רב שליט"א, וועלכער וועט פארטיילן א מתנת קודש פאר אלע משתתפים.
