היינט איז באשטעטיגט געווארן אז כ"ק גאב"ד מאקאווא שליט"א וועט פראווענען א געהויבענע שבת אינעם עיר ואם בישראל וויליאמסבורג, אין די צייט וואס דער רב שליט"א וויילט די טעג אין ניו יארק אויף א ביקור חיזוק בקרב חסידיו, לרגל די שמחת החתונה פון א קינד ביי מקורבו הנגיד החסיד ר' יעקב אבעלעס הי"ו מגדולי תומכי המוסדות.
דער מאקאווא רב שליט"א איז אנגעקומען קיין ניו יארק דעם זונטאג, און האלט זיך אויף דורכאויס די וואך בבית האכסניא ביי הנגיד החסיד ר' יודא דוד רובינשטיין הי"ו אין מאנסי.
זונטאג נאכמיטאג אנקומענדיג קיין ניו יארק איז דער רב שליט"א געפארן קיין קווינס, און פוקד געווען די ציון הק' פון אדמור"י בית ליובאוויטש זי"ע, שפעטער אין די אכסניא אין מאנסי, איז פארגעקומען א שמחת השבע ברכות לכבודו פונעם רב'ס פלומעניק הגה"צ אבד"ק מאקאווא ב"פ שליט"א בנישואי בתו.
דורכאויס די וואך איז דער רב שליט"א ארומגעגאנגען צו די קברי צדיקים אין ניו יארק, ביים ציון הק' פון הרה"ק מסאטמאר זי"ע אין קרית יואל, ביים ציון הק' פון די הייליגע צדיקים לבית וויזניץ, ריבניץ, סקולען, און קאסוב זצ"ל אויפן וויזניצע בית החיים אין מאנסי, און ביים ציון הק' פון כ"ק אדמו"ר מראחמיסטריווקא זצ"ל אויפן בית החיים הר שלום אין מאנסי.
דעם שבת קודש פרשת בא וועט דער רב שליט"א פראווענען אויף א גרויסע פארנעם בקרב חסידיו ומעריציו אין וויליאמסבורג, די גרויסע בנין פון מוסדות סאטמאר ביים ווינקל פון פארק עוועניו און טרופ עוועניו איז ספעציעל ארויסגעדינגען געווארן פאר די תפילות און טישן, און די סעודות שבת קודש וואס ווערט צוגעשטעלט פאר די הונדערטער געסט וואס שרייבן זיך איין פון פאראויס, אכסניית כבוד וועט זיין אין שטוב פון הנגיד החסיד ר' שלמה פעדער הי"ו.
