טויזענטער וויזניצער בחורים פון איבער גאנץ ארץ ישראל וועלן מארגן אויפדערנאכט זיך צוזאמנעמען אויף א געמיינזאמע כינוס חירום והתחזקות, לזעוק זעקה גדולה און איינרייסן וועלטן לישועה ולרפואה, פארן וואוילזיין פונעם געטרייען מנהיג כ"ק אדמו"ר מוויזניץ שליט"א וועלכער געפונט זיך ליידער אין די מרחקים אין א שווערע געזונט צושטאנד.
די גרויסע עצרת ווערט פאררופן דורך כלל רבני בית וויזניץ, און די חשובע מנהלים ומחנכים פון די וויזניצע ישיבות לענגאויס ארץ ישראל, אין צוזאמענארבעט פון די וואויל בארימטע מפעל יחד לבבנו וואס נעמט אריין די טויזנטער בחורי הישיבות דחסידי וויזניץ אויף כסדר'דיגע התחזקות.
די מעמד וועט פארקומען מארגן מיטוואך אויפדערנאכט בליל תענית אסתר, אינעם יום המסוגל וואס מען קען אויספועל'ן גרויסע ישועות און רפואות ווי באקאנט פון צדיקים, אינעם ריזן היכל ביהמ"ד הגדול אין קרית וויזניץ בני ברק, מקום אשר דבר המלך ודתו מגיע.
עס וועלן אויפטרעטן די חשובע משפיעים, הגה"צ ר' אהרן טויסיג שליט"א מרבני וויזניץ, הגאון ר' שאול גרינבערגער שליט"א משפיע אין ישיבה און משמש בקודש ביים רבי'ן שליט"א, און הגה"צ ר' מנחם מענדיל האגער שליט"א יונגסטער איידעם פונעם רבי'ן. אזוי אויך וועלן באשיינען די מעמד די חשובע קינדער פונעם וויזניצער רבי'ן און די דייני הקהילה וראשי הישיבות.
אין די זעלבע צייט הערט מען באריכטן פון לאס אנדזשעלעס, אז טראץ וואס דער רבי געפונט זיך טאקע אין די אכסניא און נישט אין שפיטאל, איז דער רבי אבער זייער אפגעשוואכט און קיין גענויע פלענער אויף ווייטערדיגע באהאנדלונגען קען מען דערווייל נישט אויסשטעלן, אין די צייט וואס מען ווארט בלויז אויף רחמי שמים אז דער רבי שליט"א כ"ק מרן ישראל בן לאה אסתר זאל זיך ערהוילן און צוריקקומען צו די כוחות ווי אמאל.
