דעם זונטאג כי תשא איז פארגעקומען די מעמד קביעת מזוזה און חנוכת הבית פאר די נייע פאפא בית המדרש אין שטאט בארא פארק, ספעציעל געאייגנט פאר די צעירי האברכים און די איינוואוינער אין די געגנט פון צוועלפטע עוועניו און די נידריגע פערציגער גאסן.
די נייע ביהמ"ד החדש קהלת יעקב פאפא געפונט זיך אויף די צוועלפטע עוועניו ביים ווינקל פון די צוויי און פערציגסטע סטריט, און דעם זונטאג נאכט איז כ"ק אדמו"ר מפאפא שליט"א אנגעקומען אויף תפילת מעריב און קביעת מזוזה, און אויפגעטרעטן מיט דברות קודש לרגל המאורע. אזוי אויך האט אויפגעטרעטן הגה"צ ר' לוי יצחק גרינוואלד שליט"א דומ"ץ פאפא ב"פ זון פונעם רבי'ן, און הרב ר' יואל משה וועבער שליט"א מרביץ תורה אין די קהילה.
