א גרויסארטיגע מעמד וועט פארקומען מארגן מיטוואך פרשת תולדות אינעם עיר ואם בישראל בארא פארק, ווען עס וועלן זיך צוזאמנעמען הונדערטער תלמידים וחסידים לבית ראחמיסטריווקא, מעריצים און גוטע פריינט, הורי המוסדות וידידים חשובים, אוועקצושטעלן א יסוד איתן פאר די הצלחה פון די רשת המחנות אהל יוחנן ראחמיסטריווקא וואס ווערט געבויעט לשם ולתפארת.
ווי באקאנט איז דעם פארלאפענעם זוממער פארגעקומען א גרויסארטיגע מעמד הנחת אבן הפינה פאר די נייע יונגל קעמפ מחנה אהל יוחנן ראחמיסטריווקא וואס ווערט געבויעט אין גרינפיעלד פארק, א גאנצע שטעטל פאר זיך ווערט געבויעט פון פריש מיט בנינים אדירים לתורה ולתפילה און צוצושטעלן די מערסטע מעגליך הרחבת הדעת פאר די טייערע תלמידים החשובים.
אצינד איז געלאזט געווארן אין גאנג די גרויסע קאמפיין מיטן נאמען יסוד איתן, על פי קריאת הקודש פון כ"ק אדמו"ר מראחמיסטריווקא שליט"א, וועלכער שטייט פערזענליך אין שפיץ פון דעם מאסיוון אונטערנעמונג אהערצושטעלן הרחבת הדעת פאר די תלמידי המוסדות אין לויף פון די זוממער חדשים. דער רבי שליט"א האט אפגעשריבן א ספעציעלע מכתב קודש צו רופן דעם ציבור חסידים און ידידים אנטייל צו נעמען ביי די גרויסע מעמד וואס וועט פארקומען מארגן מיטוואך אוועקצושטעלן א יסוד און קרן הבנין פארן גרויסן פראיעקט.
די גייסטרייכע מעמד וועט פארקומען מיטוואך אווענט אין די נייע פראכטפולע זאל אין בארא פארק "אולם הייטנער" בבנין החדש פון מוסדות באבוב, דער ראחמיסטריווקא רבי וועט באשיינען פערזענליך און אויפטרעטן מיט דברות קודש לכל העם הנאספים.
