פילצאליגע חסידי באבוב 45 און תושבי יוניאן ניו דזשערזי גרייטן זיך מיטצוהאלטן א זעלטן געהויבענע שבת בצל הקודש פון כ"ק אדמו"ר מבאבוב 45 שליט"א, מייסד פון די היימישע ישוב אין יוניאן, ווען דער רבי גרייט זיך צו מופיע זיין בשערי העיר צו באשיינען די שמחת האויפרוף פון א אייניקל.
דעם שבת קודש פרשת תולדות וועט געפראוועט ווערן די שמחת האויפרוף פון א אייניקל ביים רבי'ן שליט"א, די חתן א זון פון זיין עלטסטן איידעם הגה"צ ר' חיים ברוך האלבערשטאם שליט"א, וועלכער שטייט אין שפיץ פון די קהילה און מוסדות אין שטאט יוניאן, א זון פון הגה"צ אבד"ק בית אברהם שליט"א, מיט די כלה א טאכטער פון הגה"צ ר' חיים אלי' טייטלבוים שליט"א אב"ד קאריץ.
לכבוד די שמחה וואס ווערט געפראוועט במקום מגוריו פונעם אבי החתן אין יוניאן, וועט דער געהויבענער זיידע דער רבי שליט"א וויילן אין שטאט אויף שבת, און דערביי צוזעהן די געוואלדיגע הרחבת גבולי הקדושה ווען די שיינע ישוב בליהט און וואקסט לשם ולתפארת. צו קענען אקאמאדירן דעם ריזן ציבור וואס איז ערווארטעט מיטצוהאלטן די תפילות און טישן, איז אויפגעשטעלט געווארן א ריזן שאטער דורך די בארימטע רענטעסטיק פארטי רענטל פירמע, און איז אצינד אין די לעצטע פאזעס פון זיין פולקאם צוגערישט לכבוד שבת קודש.
