פארלאפענעם דאנערשטאג פרשת ויצא איז פארגעקומען א ספעציעלע שמחת השבע ברכות בחצר הקודש סקווירא, וואו עס זענען געלאדנט געווארן די צעדליגע דיינים ומורי צדק פון אלע סקווירא בתי מדרשים איבער די וועלט, כאות הוקרה פאר זייער געטריישאפט פאר חסידי סקווירא בכל מקומות מושבותיהם.
די שבע ברכות מיטן נאמען "קני המנורה" איז פארגעקומען בביתו נאוה קודש פון כ"ק אדמו"ר מסקווירא שליט"א, וואס איז געווען צוגערישט אויף א פראכטפולע פארנעם לכבוד התורה. די מעמד האט זיך שוין אנגעהויבן אין די נאכמיטאג שעות מיט א ספעציעלע תורה'דיגע פראגראם אין די געלבמאן זאל אין שיכון סקווירא, וואו עס האט אויפגעטרעטן הגה"צ ר' אברהם הערש וואזנער שליט"א אבד"ק סאטמאר מאנסי, און עס איז פארגעקומען א ספעציעלע פאנעל פון שאלות ותשובות מיט די דיינים.
צום באשטימטן צייט איז כ"ק אדמו"ר מסקווירא שליט"א ערשינען בראש המסובים און זיך געוואשן צום סעודה, מען האט געזינגען ניגוני שמחה והודאה, און עס האט אויפגעטרעטן דער יושב ראש הרב מיכל אייזענבערג הי"ו, וועלכער האט געמאלדן איבער די גרינדונג פון א נייע וועד וואס וועט שטיין צוהילף פון אלע סקווירא דיינים ברחבי תבל.
דאן האט אויפגעטרעטן מיטן משא המעמד כ"ק הגה"צ גאב"ד טענקא שליט"א, און דערנאך האט מען געהאט די זכיה צו הערן דברות קודש פונעם רבי'ן, וועלכער האט ארומגערעדט איבער די געוואלדיגע סייעתא דשמיא וואס באגלייט דיינים ומורי הוראה אין יעדע צייט. מען האט געהערט גראמען פון הרב החסיד ר' יחיאל טויבענפעלד הי"ו, און מען האט זיך ארויסגעלאזט אין פרייליכע ריקודין לכבוד די שמחה במעון הקודש.
מיטן בענטשן האט דער רבי מכבד געווען דעם אורח הכבוד כ"ק גאב"ד טענקא שליט"א, און די שבע ברכות איז געווארן צוטיילט צווישן דעם רבינ'ס עלטסטע זון הגה"צ ר' אהרן מענדיל טווערסקי שליט"א, און דער אבי החתן הרב דוד גרויס שליט"א. דערנאך זענען אלע דיינים אריבער וואונטשן לחיים, און דער רבי האט זיך אינטערסירט ביי יעדן באזונדער אויף זיין הצלחה.
די שבע ברכות איז געווארן אהערגעשטעלט מייסטערהאפטיג דורך די באקאנטע "טריפל בי" פירמע אונטער די אנפירערשאפט פון ר' יעקב יוסף בערגער הי"ו.
