חסידי וויזשניץ ברחבי תבל זענען איינגעהילט אין פרייד מיט די הרחבת גבולי הקדושה, ווען אין די יעצטיגע טעג איז געווארן אפגעקויפט א בנין רחבת ידים אין שטאט אנטווערפן, וואו עס וועט נתייסד ווערן די נייע ביהמ"ד "תורת מרדכי" דחסידי וויזשניץ, פאר חסידי ומעריצי חצרות הקודש וויזשניץ, ממשיכי דרכו פון כ"ק אדמו"ר הרה"ק בעל תורת מרדכי מוויזשניץ זצ"ל.
אין די לעצטע צוויי יאר האבן זיך די חסידים צוזאמגענומען יעדע וואך אויף שלש סעודות און אויף מסיבות מרעים אין היכל התורה אור החיים, וואו מען האט פארברענגט בשבת אחים ובדיבוק חברים, אזוי אויך איז פארהאן א כולל ערב וואו די אינגעלייט נעמען זיך צוזאם יעדע נאכט אויף קביעת עתים לתורה בשבת אחים ובדיבוק חברים.
אצינד מיט די בליה און וואוקס פונעם ציבור בליעה"ר איז געקומען די צייט צו אוועקשטעלן א נייער ביהמ"ד און מרחיב זיין די גבולי הקדושה. בברכת הקודש פון כ"ק אדמו"ר מוויזשניץ שליט"א פון לאנדאן, צו וועם א מערהייט פון די חסידים זענען הולכים לאורו, ובברכת הקודש פון די ברידער כ"ק האדמורי"ם מוויזשניץ שליט"א בני הרה"ק בעל תורת מרדכי זצ"ל, וועלכע האבן געגעבן די הסכמה ביי א פאראייניגטע זיצונג א שטיק צייט צוריק, זענען די עסקני הקהילה אריין אין קאנטראקט אפצוקויפן א שיינעם בנין רחבת ידים אויף די לאנגעלעעם גאס, וואס וועט בעז"ה פארוואנדלט ווערן אלס "ביהמ"ד תורת מרדכי" דחסידי וויזשניץ אין די נאנטע צוקונפט.
די הויז וואס ווערט געקויפט פארן ביהמ"ד איז שוין פאר לאנגע יארן א מקום תורה ותפילה אין די וויזניצער דינאסטיע, עס וואוינט דארט הגה"צ ר' אשר חיים שטערנבוך שליט"א אב"ד אהל יעקב ודומ"ץ קהל מחזיקי הדת, און אויך האט דארט געוואוינט דער ראש בית דין פון אנטווערפן הגה"צ ר' אלי' שטערנבוך זצ"ל, וועלכער איז געווען אן אייניקל פון הרה"ק בעל אהבת ישראל מוויזשניץ זי"ע.
אין די יעצטיגע וואכן ווען מען גרייט זיך צו ענדגילטיג גומר זיין דעם מקח אויפן בנין, ווערט געפלאנט א גרויסע מגבית צווישן חסידי וויזשניץ איבער די וועלט אויפצוטרייבן די נויטיגע סכומים פארן גמר המקח, א רענאוואציע פראיעקט וועט אריינגיין אין קראפט אהערצושטעלן א שיינעם היכל בית המדרש מיט צענדליגע זיץ פלעצער, מיטן האפענונג צו קענען באנייען דעם בית המדרש לתורה ולתפילה באלד נאך די ימים טובים הבעל"ט.
