קומענדיגע וואך איז כ"ק אדמו"ר מוויזניץ שליט"א לרפו"ש ערווארטעט ארויסצופארן קיין דייטשלאנד, וואו מען האפט דורכצופירן מעדיצינישע באהאנדלונגען אין א גרויסע שפיטאל אין שטאט מינכען, מיטן האפענונג צו פארבעסערן דעם רבינ'ס געזונט צושטאנד.
דער רבי שליט"א וועלכער מוטשעט זיך שוין מיט די ביטערע מחלה ל"ע פאר א יאר און א האלב, איז שוין אריבער עטליכע סעריעס באהאנדלונגען אין לויף פון די תקופה, און בחסדי ה' איז דער רבי ווייטער ממשיך מיט די עבודת הקודש און איז משפיע פאר די חסידים תורה חסידות און יראת שמים.
צוליב דעם וואס די מחלה דארף נאך אלס באקעמפט ווערן, איז באשלאסן געווארן דורך הויכראנגיגע פראפעסארן צו דורכפירן נאך מעדיצינישע באהאנדלונגען אין מינכען דייטשלאנד, וואו דער רבי איז שוין אריבער באהאנדלונגען פארלאפענע יאר, מיטן האפענונג אז עס זאל עושה רושם זיין לטובה און ברענגען א גענצליכע ערהוילונג בסייעתא דשמיא.
דער רבי וועט ארויספארן פון ארץ ישראל קומענדיגן זונטאג פרשת ויקרא, און פארוויילן אין דייטשלאנד פאר עטליכע טעג, און בעז"ה צוריקקומען אנהייב חודש ניסן זיך צו ערהוילן ווייטער אינדערהיים. אידישע קינדער זענען מתפלל אז דער רבי שליט"א כ"ק מרן ישראל בן לאה אסתר זאל האבן א גאנצע רפואה בבריות גופא ונהורא מעליא, עוד ינובון בשיבה דשנים ורעננים יהיו.
