נאך צוויי גלגולים אלס ׳שאטאנאוו׳ און ׳שאטאלאוו׳ קומט דער פאפולארער וויין צוריק אונטער א נייע נאמען צוליב דרוק פון די פראצויזישע געריכטן
מיט ארום א יאר צוריק האט די וועלט׳ס גרעסטע כשר׳ער וויין פירמע ׳הערצאג׳ אראפגענומען פון די מארקעט איינע פון זייערע פאפולארסטע וויינען, דער ׳שאטאנאוו׳ Chateneuf - א ווייסע האלב-טרוקענע וויין וואס איז געווען איינע פון די פירמעס בעסט-פארקויפטע וויינען. א זאך וואס האט איבעראשט דעם וויין מארקעט און געלאזט פראגע צייכנס, נעמנדיג אין באטראכט אז עס איז געווען א גאר פאפולארער פראדוקט.
אבער אצינד ווערט אויפגעדעקט די סיבה דערפאר ווען די פירמע האט עס צוריקגעברענגט אויף די מארקעט מיט א נייע נאמען, אונטער די ׳לע רעגאנעס׳ Les Riganes סעריע פון וויינען.
ווי עס שטעלט זיך ארויס איז דאס שוין דאס צווייטע מאל וואס די זעלבע וויין איז געצווינגען צו טוישן נאמען אויפ׳ן פארלאנג פון די פראנצויזישע אויטאריטעטן, און דאס איז א רעזולטאט פון א לעגאלע געשלאכט וואס גייט שוין פאר עטליכע יאר צווישן די ארטיגע אינסטאנצן און דער ׳רויאל וויין׳ אימפארטירער וואס ברענגט אריין די וויינען קיין אמעריקע און די גלאבאלע מארקעט.
די סיבה פאר די אנקלאגע איבער׳ן נאמען שטרייכט אונטער די גאר שטרענגע אויפזיכט וואס די פראנצויזישע רעגירונג האלט אויף די וויין מארקעט צו פארזיכערן אז עס קומט נאך זייערע פארלאנגען. לויט׳ן געזעץ דארט מעגן וויינען נאר גערופן ווערן געוויסע נעמען אויב זיי ווערן פראדוצירט אין געוויסע ראיאנען אין פראנקרייך, א שטייגער ווי דער ׳בארדאו׳ וויין וואס רופט זיך נאכ׳ן ׳בארדאו׳ פראווינץ אין פראנקרייך, אדער דער ׳שאמפעין׳ וועלכע רופט זיך נאך די ׳שאמפעין׳ פראווינץ – א זאך וואס ווערט שטארק אינפארסירט.
אויסער די לעגאלע קאנסעקווענצן אין פראנקרייך, האלט די ארטיגע רעגירונג א שטרענגע אויג אויף די לעגאלע מארקעט און נעמען אונטער לעגאלע שריט קעגן וויין פאבריקן איבער די וועלט אויב געבן זיי א נאמען פאר א וויין וואס אונטערמינעוועט די פראנצויזישע שטאלץ און די רעכטן פון אירע געביטן איבער די ספעציפישע וויינען פאר וועלכע זיי זענען בארימט.
ווי עס שטעלט זיך ארויס איז דער ׳שאטאנאוו׳ וויין - טראץ איר ענליכקייט צו די וויין פון דעם ׳שאטאנאוו׳ ראיאן, Châteauneuf-du-Pape ווערט זי אבער פראדוצירט אין אן אנדערע געגענט אין פראנקרייך, און דאס איז געווען גענוג פאר די אינסטאנצן פון די ׳שאטאנאוו׳ ראיאן צו אריינגעבן א קלאגע קעגן די ׳רויאל וויין׳ פאבריק אז זיי מוזן טוישן דעם נאמען. דעריבער האט די פירמע טאקע געטוישט דעם נאמען מיט עטליכע יאר צוריק פון ׳שאטאנאוו׳ צו 'שאטאלאוו׳ֿ Chateleufe אין א פארזוך צו איבערקלוגן דעם אורטייל.
אבער דאס האט נישט צופרידנגעשטעלט די ארטיגע אינסטאנצן וועלכע האבן ווידער איינגערייכט א קלאגע אינעם ארטיגן געריכט זאגנדיג אז דער נאמען איז צו ענליך און קען פארפירן מענטשן אז דאס איז טאקע פון דעם ראיאן. און זענען אצינד אין געריכט קעגן די פירמע צו פארלאנגן אנטשעדיגונג געלטער. דאס האט געברענגט דערצו אז מיט א יאר צוריק האט די פירמע געמוזט גענצליך אראפנעמען דעם וויין פון די פאליצעס אין געשעפטן צוליב די לעגאלע שוועריגקייטן.
עס איז מערקווירדיג אז נאנט צו הונדערט יאר נאכדעם וואס דער ארגינעלער ׳הערצאג׳ וויין פאבריק אין טשעכאסלאוואקיע איז געשלאסן געווארן דורך די נאצי אויטאריטעטן, טרעפט זיך די פירמע ווידער אין א לעגאלע שלאכט אויפ׳ן אייראפעאישן באדן, דאסמאל אלס איינע פון די וועלטס-גרעסטע וויין אימפעריעס. א ווארטזאגער פאר די הערצאג וויין פירמע געט איבער ״טראץ וואס עס וואלט זיך אפשר געלוינט צו קעמפן אין געריכט, איז אונז אבער ענדערש צו טרעפן א לעזונג און אנהאלטן אונזערע באציאונגען מיט די ארטיגע אינסטאנצן״ א באציאונג וואס איז גאר וויכטיג פאר זיי אלס דער גרעסטער כשר׳ע עקספארטער אין פראנקרייך.
אצינד האט די פירמע ווידער געברענגט דעם וויין צו די מארקעט. דאסמאל אונטער א גענצליך נייע נאמען. עס ווערט יעצט פארקויפט אלס דער ׳סעמי-ווייסע וויין׳ אינעם ׳לע ריגאנעס׳ קאלעקשן. א סעריע פון הויכע קוואליטעט פראנצויזישע וויין וואס ווערן פארקויפט פאר צוגענגליכע פרייזן אונטער דעם ברענד. אבער די לעגאלע סאמאטוכע האט געברענגט אסאך שאדן צו די פירמע וועלכע האפט אז דער נייער וויין וועט געניסן פון די זעלבע פאפולאריטעט ווי דער ארגינעלער ׳שאטאנאוו׳ און ׳שאטאלאוו׳.
ר׳ יוסף בוקסבוים, ווארטזאגער פאר רויאל וויין זאגט ״שאטאנאף איז איינע פון אונזערע פאפולארסטע וויינען, און פארקויפט זיך די בעסטע שוין פאר אסאך יארן. דער נאמען אויפ׳ן פלאש איז נישט די הויפט סיבה, נאר איר ספעציעלקייט אלס א געשמאקע צוגענגליכער וויין. און דאס האט זיך נישט געטוישט, די שאטאנאף ליבהאבער וועלן יעצט געניסן פון די סעמי-דריי לע ריגאנעס׳״
