דעם מוצאי שבת קודש פרשת חיי שרה וועלן אלפי חסידי גור איבער די גארער וועלט זיך צוזאמקומען אין די בתי מדרשים, און אין די היכלי הישיבות והכוללים ברחבי תבל, צו לערנען א סדר לימוד פון א שעה צייט, עס זאל זיין א זכות לרפואה שלימה פאר כ"ק אדמו"ר מגור שליט"א, וועלכער איז ליידער ערנסט אפגעשוואכט די לעצטע תקופה.
ווי באקאנט האט דער רבי שליט"א אנגעהויבן דורכגיין דיאליסיס באהאנדלונגען מיט צוויי וואכן צוריק, און מען האפט אז די פעולות זאל עושה רושם זיין לטובה. אצינד האבן די קינדער פונעם רבי'ן געבעטן אז די חסידים זאלן זיך צוזאמנעמען אויף א סדר לימוד פון איין שעה, עס זאל זיין א זכות לבריאתו השלימה פונעם רבי'ן ולחיזוק כוחותיו במהרה.
היינט ערב שבת קודש איז געמאלדן געווארן פאר די טויזענטער חסידים איבער די וועלט, אז מען זאל זיך צוזאמקומען אין די בתי מדרשים און ישיבות פאר א סדר לימוד, קומענדיגן מוצאי שבת קודש נאך תפילת מעריב, זקנים ונערים, אברכים און בעלי בתים, מען זאל לערנען סיי וואס, צו לימוד מזומנים, ספרי מוסר וכדומה, לזכות רפואה פארן רבי'ן שליט"א, כ"ק מרן יעקב ארי' בן יוטא הענא בתוך שאר חולי ישראל.
