אין ביהמ"ד הגדול היכל מהרי"ץ דושינסקיא אויף רחוב שמואל הנביא אין ירושלים עיה"ק, איז אין די יעצטיגע טעג אונטערגענומען געווארן א מאסיווע בוי פראיעקט צוצוברענגען צום היכל בית המדרש נאך הונדערטער זיץ פלעצער, צו קענען אקאמאדירן דעם ריזן ציבור חסידים בליעה"ר וואס קומען וויילן ביים רבי'ן להסתופף בצל הקודש, איבערהויפט אין די הייליגע טעג אין די ימים הנוראים, ווען די געדרענג שרייט זיך ארויס פון יעדן ווינקל שוין עטליכע יאר.
אין די לעצטע פאר חדשים זענען די עסקנים געזעסן מיט א רייע אינדזשענירן צו דורכטון אלע אפציעס, און אצינד איז באשטעטיגט געווארן אז מען וועט ארויסבויען אויף מזרח זייט פון בית המדרש, אן ערך פון אכט מעטער וואס איז פיר און צוואנציג פיס, און דאס וועט בעז"ה צוברענגען נאך זעקס הונדערט זיץ פלעצער צום היכל בית המדרש.
די האפענונג איז אז צום קומענדיגן יו"ט ראש השנה זאל מען שוין קענען נוצן די נייע צוגעלייגטע פלעצער, ווען צוערשט וועט מען אויפמאכן די מזרח וואנט און בויען די נייע זוילן, וואס וועט ערמעגליכן צו פארמאכן דעם היכל אויף א שנעלע פארנעם עס זאל זיין גרייט ביז עטליכע וואכן.
