בארא פארקער איינוואוינער האלטן מיט די לעצטערע חדשים די אנגייענדע אנטוויקלונגען איבער די מאימאנידיס שפיטאל, ווען די שפיטאל פארוואלטונג האט באשלאסן אריינצושטעלן דעם גאנצן שפיטאל אונטער די ניו יארק סיטי שפיטאל סיסטעם, וואס וועט דראסטיש טוישן די סיסטעם וויאזוי פאציענטן ווערן באהאנדלט און נאך פארשידענע טוישונגען אויף א נעגאטיווע פארנעם.
וואוסענדיג די שווערע אפעקט וואס די טויש קען האבן פאר די איינוואוינער אין בארא פארק, וואס וועט גאר שטארק אפעקטירן אחינו בני ישראל, איז שוין געווארן אונטערגענומען מערערע פרואוון דורך לאקאלע פאליטיקאנטן אפצוהאלטן דעם אנטוויקלונג, אבער דערווייל האט גארנישט געהאלפן און די פלאן פארט ווייטער, ווארטענדיג אויף באשטעטיגונג פון די סטעיט באאמטע אין ניו יארק.
אצינד האבן א צאל קאמיוניטי גרופעס אין ניו יארק סיטי, אינאיינעם מיט פאציענט אדוואקאטן ארגענעזאציעס, אריינגעגעבן א אפיציעלע קלאגע אין די ניו יארק סטעיט סופרים קאורט אין אלבאני, איבער דעם וואס דער סטעיט העלט קאמישינער האט באשלאסן צו פאראויסגיין מיט די פלאן, אן די פארלאנגטע באשטעטיגונג פון די פאבליק העלט קאונסיל אין ניו יארק.
עטליכע גרויסע קהילות אין בארא פארק, וואס רעכנט אריין סאטמאר, באבוב, באבוב 45, בעלזא, און נאך, האבן זיך פאראייניגט מיט די אנקלאגע, אין די צייט וואס די טויש קען שטארק אפעקטירן די חברי הקהילות און בארא פארקער אידן, מיטן האפענונג אז עס זאל עושה רושם זיין און די פלאן זאל ווערן אפגעשטעלט לרווחת תושבי העיר.
