תלמידי וחסידי סאטמאר זענען איינגעהילט אין א פרייליכע שטימונג פון הרחבת גבולי הקדושה, ווען מען הערט א גוטע בשורה פונעם ווייטן מאנטריאל קאנאדע איבער א מוצלח'דיגע מקח וואס איז אריין אין קראפט, אפצוקויפן א גיגאנטישע געביידע פאר די סאטמארע תלמוד תורה אין מאנטריאל, המתנוסס לתפארה און זעהט א שטארקע בליה און וואוקס.
די תלמוד תורה איז געעפנט געווארן מיט בלויז צוויי יאר צוריק, בברכתו ובעידודו פון כ"ק אדמו"ר מסאטמאר שליט"א, נאך וואס די צאל תלמידים איז שטארק געשטיגן און עס האט זיך אויסגעפעלט א אייגענע תלמוד תורה. זינט איר עפענונג איז עס געבענטשט געווארן מיט א כתר שם טוב, און די צאל תלמידים איז בלויז געשטיגן און געוואקסן.
די גרויסע געביידע איז סטאנציאנירט אויף די בעיטס גאס, און נעמט אריין גאנצע זעכציג טויזענט סקווער פיס, צושפרייט אין פינף ברייטע שטאקן. די צענדליגע קלאס צימערן און גרויסע זאלן וועט שטארק בענעפיטירן פאר די הנהלת המוסדות אין אלע תלמידים, וואס וועלן קענען שטייגן במעלות רמות צווישן אירע ווענט מיט הרחבת הדעת.
