אפדעיט פרייטאג אמור אינדערפרי
די העלישע פייער ביים פרדס בנין פון ישיבת מתיבתא אויף די קעזענאוו גאס אין לאנדאן, האט פארניכטעט דריי באוואוינטע געביידעס וואס האבן שטארק געפלאקערט ארום דריי שעה, ביז די פייער באאמטע האבן געברענגט די פייער אונטער קאנטראל. פינף משפחות זענען ליידער געבליבן אן א דאך איבערן קאפ, ווען זייער גאנצע האב און גוטס איז ארויף אין די פלאמען.
דורכאויס די נאכט האבן א צאל געשעפטן אין די סטעמפארד הילל געגנט געעפנט זייערע טויערן פאר די באטראפענע משפחות זיך צו קענען איינהאנדלען בחנם אלע באדערפענישן, און עסקנים ארבעטן צו פלאצירן די פאמיליעס אין אנדערע לאקאלן.
די גרויסע סאטמארע בית המדרש אויף קעזענאוו וואס איז עוועקואירט געווארן אויפן פלאץ, זייענדיג הארט נעבן די ברענענדיגע געביידע, איז דערווייל נאכנישט געווארן פולקאם צוריק געעפנט, צוליב דעם וואס די פאליציי גייט אן מיט א העפטיגע אויספארשונג אויפן סצענע.
בחסדי ה' איז נישט פארהאן קיין פארוואונדעטע פון די פייער, און מען האפט אז די תלמידי הישיבה זאלן קענען צוריקגיין לערנען בין כותלי הישיבה גלייך נאך שבת.
אפדעיט מיטוואך 5:20 נאכמיטאג אין לאנדאן
די ספרי תורה פונעם בנין הישיבה ווערט ארויסגעראטעוועט דורך די פייערלעשער און עסקנים.
אפדעיט מיטוואך 5:00 נאכמיטאג אין לאנדאן
די פייער האט זיך אנגעהויבן ביי די אונטערשטע שטאק פון די געביידע, וואס דינט אלס קאך פון די ישיבה. די ספרי תורה זענען באצייטנס געווארן ארויסגעראטעוועט, און אלע בחורים זענען עוועקואירט געווארן פון די געביידע.
----
א העלישע פייער האט אויסגעבראכן יעצט נאכמיטאג אין לאנדאן, אין די בנין פון ישיבת מתיבתא אויף קעזענאוו ראוד, די פייער פלאקערט גאר שטארק און האט איינגעהילט די גאנצע געביידע אויף 90 קעזענאוו, וואס דינט אלס חדר אוכל פון די ישיבה און נאך פארשידענע איינריכטונגען.
ווי באקאנט האט די נאסטאלגישע ישיבת מתיבתא אין לאנדאן בייגעוואוינט א שרעקליכע שריפה מיט צענדליגע יארן צוריק, ווען די דארמיטארי איז ארויף אין פלאמען, און עס האט ליידער געקאסט דאס לעבן פון א בחור אין ישיבה ה"י.
פייערלעשער געפונען זיך אויפן סצענע און ארבעטן צו איבערקומען די העלישע פלאמען, דערווייל איז נישט קלאר וויאזוי די פייער האט זיך אנגעהויבן, און לויט די באריכטן איז דא איין קריטיש פארוואונדעטער אין די פייער.
