היינט דינסטאג איז כ"ק אדמו"ר מדעעש שליט"א ערווארטעט צו לאנדן בשערי ניו יארק, קומענדיג אויף א לענגערע נסיעה פון צוויי וואכן צו באשיינען צוויי חתונות במעון קדשו, און דערביי וועט דער רבי שליט"א אויסנוצן די געלעגנהייט צו אויפטרייבן גרויסע געלטער למען החזקת מוסדותיו ומפעליו הקדושים.
דער רבי שליט"א האט זיך ארויסגעלאזט מביתו נאוה קודש אין בני ברק היינט דינסטאג פארטאגס, און איז ערווארטעט צו לאנדן אין ניו יארק אין די פריע נאכמיטאג שעה'ן, מארגן מיטוואך וועט דער רבי שליט"א באשיינען די שמחת החתונה פון א אייניקל, די חתן א זון פון זיין זון הגה"צ ר' מרדכי פאנעט שליט"א איידעם ביי כ"ק אדמו"ר מלויעוו טשערנאביל שליט"א, וואס קומט פאר אין די ווילחאוויץ זאל אין מאנסי.
דאנערשטאג נאכט וועט פארקומען די שמחת השבע ברכות אין ביהמ"ד מראה יחזקאל דעעש אין מאנסי, און דערנאך וועט דער רבי ארויספארן צום וואודבארי דזשאנקשען געגנט שכונת חתם סופר אין קרית יואל, וואו דער רבי וועט פראווענען א געהויבענע שבת אינאיינעם מיט די תושבי השכונה, בבית האכסניא אין שטוב פון הנגיד החסיד ר' משה הערש ראזענפעלד הי"ו, זון פון הרה"ג ר' יצחק יעקב ראזענפעלד שליט"א ר"ם במתיבתא תורה ויראה ד'סאטמאר שיעור ד' אין קרית יואל, ומוותיקי חסידי דעעש.
קומענדיגע וואך מיטוואך פרשת בהעלותך וועט דער רבי שליט"א מפאר זיין על ראש שמחתו ביי די שמחת החתונה פון א אייניקל, די חתן יונגסטע זון פונעם רבינ'ס איידעם הגה"צ ר' ישכר דוב טויב שליט"א אב"ד קאלוב וומס"ב בן כ"ק אדמו"ר מקאלוב שליט"א, מיט די כלה א אור אייניקל פון כ"ק אדמו"ר מסקווירא שליט"א, וואס קומט פאר אין ביהמ"ד הגדול אין שיכון סקווירא. לויטן פלאן וועט דער רבי פראווענען די קומענדיגע וואך שבת פרשת בהעלותך בקרב חסידיו אין מאנסי, בבית מדרשו קהל מראה יחזקאל דעעש אויף נארט קאול.
