אין די צייט וואס די מצב הבריאות ביי כ"ק אדמו"ר מהורדענקא שליט"א פון מאנטשעסטער איז ליידער זייער נישט גוט, ווען דער רבי שליט"א געפונט זיך על ערש דוי אינעם ווייטן קליוולאנד אין אהייא, האט מען אין די טעג צוגעלייגט א נאמען פארן רבי'ן, להחזיקו ולהחיותו, להחלימו ולרפאותו.
דער הורדענקא רבי שליט"א וועלכער האט זיך געפונען אין שפיטאל אין ציריך שווייץ פאר עטליכע חדשים, איז מיט עטליכע וואכן צוריק געווארן אריבערגעפירט קיין קליוולאנד צו א גאר פארגעשריטענע שפיטאל מיט פראפעסיאנאלע דאקטוירים, מיטן האפענונג אז די פעולות רפואה זאלן ברענגען די געוואונטשענע רעזולטאטן.
ליידער אבער דערקענט זיך נישט קיין פארבעסערונג אינעם מצב, און זייענדיג אנגעוויזן אויף גרויס רחמי שמים האבן די בני המשפחה אנגעפרעגט ביי עטליכע גדולי הדור צו מען זאל צולייגן א נאמען, צווישן זיי ביי כ"ק אדמו"ר מפשעווארסק שליט"א, און ביים משגיח הגאון הגדול רבי דן סגל שליט"א.
בהוראת הרבנים האט מען צוגעלייגט דעם נאמען "רפאל", און אידישע קינדער ווערן געבעטן צו מתפלל זיין פאר כ"ק מרן רפאל יצחק ארי' בן חנה לרפואה שלימה, דער רבי זאל ארויסקריכן פון דעם שווערן מצב, און קענען ווייטער משפיע זיין פאר כלל ישראל ברוחניות ובגשמיות.
