אין די יעצטיגע טעג איז ענדגילטיג באשטעטיגט געווארן די גענויע פלענער פאר די לאנג ערווארטעטע מאמענט ביי תלמידי וחסידי אלכסנדר תושבי בארא פארק, ווען עס וועט געפראוועט ווערן די גרויסארטיגע מעמד חנוכת הבית פאר די נייע בית החסידים אמרי מנחם אלכסנדר, וואס פיגורירט לשם ולתפארת אינעם עיר ואם בישראל בארא פארק.
די אלכסנדר שטיבל אויף די ניין און פערציגסטע סטריט צווישן די פערצנטע און פופצנטע עוועניוס, ווערט געפירט תחת דגלו והדרכתו פון כ"ק אדמו"ר מאלכסנדר שליט"א, על ישראל הדרתו אינעם עיר התורה והחסידות בני ברק, דער רב הקהילה הרה"ג ר' יוסף ארנסטר שליט"א איז משפיע פאר די חברי הקהילה תורה וחסידות אויף א כסדר'דיגע פארנעם.
אין די לעצטע פאר יאר גייט אן העפטיגע בוי ארבעט אהערצושטעלן א פראכטפולע בנין בית המדרש ווי עס פאסט לכבוד בית השם, און אצינד ווען מ'גרייט זיך שוין צו פארענדיגן די לעצטע פאזעס אין די מלאכת הבניה, איז באשטימט געווארן די גענויע דאטום ווען עס וועט פארקומען די גרויסע חגיגה חנוכת הבית.
די מעמד וועט פארקומען דאנערשטאג פרשת ויקהל כ' אדר, אין שפיץ פון כ"ק אדמו"ר מאלכסנדר שליט"א וועלכער וועט ספעציעל קומען צו פארן קיין ניו יארק באשיינען די מעמד, דער רבי וועט פארבלייבן אין שטאט אויף שבת פרשת ויקהל שבת פרה, און פראווענען א שבת התאחדות בקרב חסידיו תושבי בארא פארק.
