אלפי חסידי סקווירא נעמען אויף מיט איבערראשונג די פרישע אנטוויקלונג פון הרחבת גבולי הקדושה בתוככי קרית מלך רב שיכון סקווירא, ווען אין די יעצטיגע טעג איז באשטעטיגט געווארן א מאסיווע בוי פראיעקט וואס ווערט אונטערגענומען לנצח על מלאכת בית ה', אויפצובויען א גיגאנטישן בנין לשם ולתפארת וואס וועט דינען אלס "היכל הטישן" און "היכל התורה", אויפן ארט וואו עס געפונט זיך די אלטע בית המדרש הגדול אין שטעטל.
די גיגאנטישע בנין וועט זיין איינגעטיילט אין צוויי, אויף די ערשטע שטאק וועט זיין א ריזן היכל התורה וואס וועט זיין פראכטפול אויסגערישט מיט פלאץ פאר הונדערטער חברותות און צענדליגע טויזענטער ספרי קודש, צו געבן הרחבת הדעת פאר די טויזענטער חסידים ותושבי השיכון צו קענען לערנען מיט הרחבה.
א שטאק העכער דעם וועט געבויעט ווערן די גיגאנטישע היכל השולחנות, וואו כ"ק אדמו"ר מסקווירא שליט"א וועט אפרעכטן די טישן דורכאויס די יאר, און דארט וועט פארקומען אלע גרויסע מעמדים און מאורעות אין די סקווירא הויף, די היכל וועט זיין עטליכע שטאק הויעך מיט א צאל גאלעריעס צו קענען אקאמאדירן די טויזענטער חסידים פון נאנט און ווייט, מיט גרויס הרחבה אויף וואס יעדער קוקט שוין ארויס א לאנגע צייט.
די פרישע אנטוויקלונג קומט אלס המשך צום מאסיוון בוי פראיעקט בחצר הקודש סקווירא, בויענדיג די נייע בית המדרש הגדול וואס איז שוין ב"ה באנייעט געווארן לשם ולתפארת, לשמחת לבם פון אלפי חסידי סקווירא ברחבי תבל. אין צוזאמענהאנג מיט די בוי פראיעקט פונעם ביהמ"ד, איז באטראכט געווארן פארשידענע אפציעס וואו צו אויפבויען א גרויסע היכל השולחנות, נאך וואס די פריערדיגע היכל השולחנות, היכל "רנה ותפלה", איז אריינגענומען געווארן אלס טייל פון די נייע ביהמ"ד, און דערווייל קומען פאר די טישן און מעמדים אין די נייע ביהמ"ד.
צווישן די פילע פלענער וואס איז געווען אויפן טיש, איז געווען צו פארוואנדלען די אלטע בית המדרש אלס א היכל הטישן, אבער מיטן בליה און וואוקס פונעם ציבור בליעה"ר, ווען פאריאר אין די הייליגע טעג איז שוין געווען א שטארקע געדרענג אינעם אלטן ביהמ"ד ביי די טישן, אין צוגאב צו די אנטוויקלונג מיט עטליכע וואכן צוריק, ווען א טייל פון די דאך איז איינגעפאלן, און די אינדזשענירן האבן געהייסן אפשפארן דעם אלטן בית המדרש, וואס האט נאכמער געברענגט פארצווייפלונג צו מען קען בכלל ווייטער נוצן דעם אלטן בנין בית המדרש, איז אצינד באשלאסן געווארן צו אראפווארפן די אלטע ביהמ"ד און אויפבויען אויפן ארט א גיגאנטישער בנין "היכל השולחנות והיכל התורה".
אין די יעצטיגע טעג קומען פאר העפטיגע אסיפות און באראטונגען צווישן די עסקנים אויסצוארבעטן אלע דעטאלן פונעם בוי פראיעקט, מיטן האפענונג צו קענען באנייען דעם בנין אדיר לתורה וחסידות ביז א יאר ארום, לקראת ראש השנה תשפ"ח. אזוי אויך האט מען אפגעשטופט די פלענער צו פארענדיגן די געבוי פונעם נייעם ביהמ"ד, וויבאלד לעת עתה איז נישט מעגליך צו ליידיג מאכן די נייע בית המדרש פאר בוי ארבעט אפילו פאר א קורצע תקופה, נישט האבענדיג קיין אנדערע היכל וואו צו דאווענען און אפרעכטן די מעמדים.
