נאך וואס אין די פארגאנגענע תקופה האבן עטליכע סקווירא חסידים זיך ארויסגעצויגן צו די נעניועט געגנט נעבן מאנסי, אין די צייט וואס פילע אידן ציען זיך אהין פאר בעסערע פרייזן און נאך פארשידענע מעלות, איז דעם פארגאנגענעם שבת קודש געעפנט געווארן א נייע בית המדרש פאר חסידי סקווירא אין נעניועט, בעידודו ובברכתו פון כ"ק אדמו"ר מסקווירא שליט"א.
דאס קומט נאך עטליכע וואכן וואס די סקווירא חסידים אין נעניועט האבן זיך שוין צוזאמגענומען אויף חבורות זיך צו האלטן אינאיינעם באחדות, און די וויכטיגקייט אוועקצושטעלן א סקווירא שטיבל האט זיך שטארק אנגעזעהן אויף טריט און שריט. בברכתו פונעם רבי'ן האט מען געעפנט דעם בית המדרש פאר די שבת'דיגע תפילות, וואס איז איינקוואטירט אויף דערווייל אין די בעיסמענט פון איינער פון די חסידים תושבי השכונה.
פרייטאג צונאכטס פרשת ואתחנן נחמו איז צום ערשטן מאל פארגעקומען די תפילות אין די נייע בית המדרש, און מען האט געהערט א דרשה פון הרב אליהו אלימלך סמיט שליט"א איבער די וויכטיגקייט פון זיך האלטן אינאיינעם און דאווענען בצוותא חדא.
