נעכטן זונטאג האבן פילע אידן אין מעקסיקא סיטי מקבל געווען בהדרת כבוד א חשובע דעלעגאציע פון רבנים וראשי ישיבות, וואס זענען געקומען צו פארן דעם לאנגן וועג פון ארץ ישראל, אויפצוטרייבן פרישע געלטער לטובת דעם קרן עולם התורה בארה"ק, צו פינאנצירן די ישיבות און כוללים אין ארץ ישראל, וואס זענען ליידער אין א שווערן מצב צוליב די גזירת הגיוס.
די עהרנפולע דעלעגאציע באשטייט פון הגאון הגדול רבי יעקב הלל שליט"א ראש ישיבת אהבת שלום, הגאון הגדול רבי אברהם סאלים שליט"א ראש ישיבת מאור התורה, הגאון הגדול רבי שמעון גלאי שליט"א, הגאון הגדול רבי יהושע אייכענשטיין שליט"א ראש ישיבת יד אהרן, הגאון הגדול רבי יוסף חברוני שליט"א מראשי ישיבת חברון, ואתם עמם איז געקומען צו פארן פון אמעריקע הגאון הגדול רבי מלכיאל קאטלער שליט"א ראש ישיבה בית מדרש גבוה ד'לעיקוואד.
נאך וואס די גדולי הדור האבן געלאנדעט אין מעקסיקא סיטי זונטאג נאכמיטאג, זענען זיי געווארן אפגעווארט דורך די עסקני הקהילה און פילע נדיבי לב, אינאיינעם מיט די לאקאלע אויטאריטעטן. דאן האט זיך אנגעהויבן א רייע מסיבות און באנקעטן וואו די גדולי ראשי ישיבות זענען ארויף לבתי נגידים ושועים אויפצוטרייבן גרויסע סכומים פארן עולם התורה.
היינט מאנטאג אויפדערנאכט וועט בעז"ה פארקומען א גרויסע מעמד קבלת פנים און עצרת תפילה למען שלום אחינו בני ישראל בארץ הקודש, וואו עס איז ערווארטעט א ריזן ציבור תושבי העיר, אנשים נשים וטף.
