חסידי בעלזא אינעם עיר ואם בישראל בארא פארק האבן אויפגענומען מיט גרויס פרייד די ידיעה אז בנו יחידו פון כ"ק אדמו"ר מבעלזא שליט"א, הרה"צ ר' אהרן מרדכי רוקח שליט"א, וועט מופיע זיין בשערי העיר אויף א לענגערע באזוך, מחזק צו זיין די בעלזא קהילות און מוסדות בתוככי העיר, און משפיע זיין אויף די חסידים פונדערנאנט אין לויף פון גאנצע צען טעג.
די לענגערע באזוך איז באשטימט אויף ענדע חודש טבת און אנהייב חודש שבט, ווען דער חשובער גאסט הרה"צ ר' אהרן מרדכי שליט"א וועט זיין צוגאסט אין שטאט בארא פארק פון מאנטאג פרשת וארא ביז דאנערשטאג פרשת בא, און דורכאויס די ימי הביקור אפשטאטן געהויבענע באזוכן אין אלע בעלזא שטיבלעך לענגאויס די שטאט, און מחזק זיין די טויזענטער תלמידי המוסדות, די תלמוד תורה, די ישיבות קטנות, די מיידל שולע, און אלע אפטיילונגען פון די קהילות ומוסדות דחסידי בעלזא אין בארא פארק.
די ימי הביקור וועט זיין א געלעגנהייט פאר חסידי בעלזא זיך צו דערווארעמען בצילו פונעם נצר לשלשלת הקודש, און נהנה זיין עצה ותושיה ביים רבינ'ס זון בשליחות הקודש. צום הויכפונקט וועט געפראוועט ווערן א גרויסע שבת התאחדות פאר חסידי בעלזא תושבי העיר, וואס וועלן האבן די זכיה להסב על שולחן בן המלך.
