בנחמה פורתא האבן די צענדליגע איינוואוינער אין קרית קאשוי אין בעדפארד היללס אויפגענומען די פרייליכע בשורה, איבער די אויפנאמע פון הגה"צ רבי שמואל מאיר בלום שליט"א זון פון הגה"ק מקאשוי זצ"ל בעל ברכת שמים, לכהן פאר אלס רב ואב"ד אין קרית קאשוי המעטירה, ולצידו איז געווארן אויפגענומען אלס רב הצעיר אין קרית קאשוי, הגה"צ ר' יודל פירטה שליט"א נין ונכד צו די קאשויער רבנים.
די פרייליכע הכתרה קומט עטליכע חדשים נאך די פטירה פון הגה"צ רבי יוסף יהושע העשיל בלום זצ"ל גאב"ד קרית קאשוי, וועלכער איז נפטר געווארן פארגאנגענעם דינסטאג פרשת ויקרא כ"ח אדר, לדאבון לב תלמידיו וחסידיו וכל בית ישראל, איבערהויפט די חשובע איינוואוינער אין קרית קאשוי וואס זענען געבליבן פאריתומ'ט אן קיין רב ומורה דרך.
אין לויף פון די לעצטערע חדשים איז פארגעקומען מערערע אסיפות צו קענען אויפנעמען א פאסיגער רב אן איש על העדה, און דעם שבת קודש פרשת ואתחנן שבת נחמו, איז געווען די לאנג ערווארטעטע מאמענט ווען עס איז אין א מזל'דיגע שעה געווארן אויפגענומען די נייע ממשיכים, א חשובער רב און א רב הצעיר וואס זאלן שטיין בראש העדה און פארזיכערן די הצלחה פון די תושבי הקריה ברוחניות ובגשמיות.
הגה"צ רבי שמואל מאיר בלום שליט"א איז דער דריטער זון פון הגה"ק מקאשוי זצ"ל בעל ברכת שמים, נאכן עלטסטן זון כ"ק אדמו"ר בעל שיחי חיים מקאשוי זצ"ל, און נאכן צווייטן זון להבחל"ח הגה"צ ר' שאול שלום בלום שליט"א. דער רב שליט"א וואוינט אין קרית קאשוי רבות בשנים, און איז אלע יארן געשטאנען לימין קדשו פון זיין גרויסן פאטער, פירנדיג די שטעטל מיט גרויס געטריישאפט און געוואלדיגע מסירת נפש. אזוי אויך האט ער פאר לאנגע יארן געדינט אלס מרביץ תורה אין די בארימטע קאשויער ישיבה.
אלס רב הצעיר איז געווארן אויפגענומען הגה"צ ר' יודל פירטה שליט"א, א זון פון הגה"צ ר' יעקב בנימין פירטה שליט"א, איידעם ביי כ"ק אדמו"ר בעל שיח חיים מקאשוי זצ"ל, און א איידעם ביים פריערדיגן רב הגה"צ רבי יוסף יהושע העשיל בלום זצ"ל גאב"ד קרית קאשוי. דער חשובער רב הצעיר איז שוין לאנגע יארן באקאנט ביי די תושבי הקריה מיט זיין כח התורה וההוראה, און וועט פון יעצט און ווייטער דינען אלס רב הצעיר, שטיין לימינו פונעם נייעם רב און ארויסהעלפן בכל דבר קטן וגדול פארן שטעטל בכלל, און פאר אלע איינוואוינער בפרט ברוחניות ובגשמיות.
לכבוד די שבת הכתרה האט זיך אנגעזעהן א שיינע ציבור חסידים און מעריצים אין קרית קאשוי, ובראשם די חשובע געסט הגה"צ גאב"ד יעמערינג שליט"א חתנא דבי נשיאה פון הגה"ק מקאשוי זצ"ל, און כ"ק אדמו"ר מקאשוי שליט"א יונגסטער זון פון הגה"ק מקאשוי זצ"ל. פרייטאג צונאכטס ביים דאווענען איז דער נייער רב שליט"א מכובד געווארן צו שטיין ביים ספעציעלן שטענדער וואו עס איז געשטאנען זיין גרויסן פאטער דער קאשויער רב זצ"ל, און זיין יונגערן ברודער דער רב זצ"ל, און אויך פארן רב הצעיר איז צוגעגרייט געווארן א ספעציעלן שטענדער ביים מזרח וואנט.
צו תפילת מנחה ערב שבת איז דער נייער רב שליט"א צוגעגאנגען מיט גרויס התעוררות, און דערנאך האט אויפגעטרעטן זיין יונגערן צווילינג ברודער הגה"צ ר' משה מנחם בלום שליט"א, וועלכער האט בשם דעם גאנצן ציבור ווארעם געוואונטשן אחיו הגדול דער נייער רב שליט"א לכבוד די התמנות.
שבת אינדערפרי נאכן דאווענען איז פארגעקומען א גרויסע קידוש לכבוד די הכתרה, וואו עס האט צוערשט אויפגעטרעטן מיט דברי ברכה הגה"צ גאב"ד יעמערינג שליט"א, דער יעמערינגער רב האט ווארעם געוואונטשן דעם נייעם רב און דער רב הצעיר, און ארויסגעברענגט די געוואלדיגע איבערגעגעבנקייט וואס זיין שוואגער דער רב שליט"א האט געהאט צום גרויסן טאטן די אלע יארן.
דערנאך האט דער נייער רב שליט"א אויפגעטרעטן מיט א דרשה מיט א קול געשטיקט פון טרערן, זאגענדיג אז ער האט קיינמאל נישט געקלערט פון אנקומען אויף דעם פאזיציע, און אצינד אז דער בורא כל עולמים האט אזוי צוגעפירט בעט ער א תפילה צו קענען שטיין דערמיט מיט אזא גרויסע אחריות. דערביי האט דער רב שליט"א אפעלירט ביים גאנצן ציבור זיך צו האלטן באחדות, וואס איז די איינציגסטע וועג צו האבן א קיום און דורכגיין אלע שוועריגקייטן אין יעדן הינזיכט.
